Sağlam gənc nəsil, ilk növbədə, ölkənin gələcək inkişafı üçün lazımdır

Bakı:

23 °C

76 %

10 m/s

Əlaqə

AZ RU EN

Ana səhifə / YAP xəbərləri / Sağlam gənc nəsil, ilk növbədə, ölkənin gələcək inkişafı üçün lazımdır

Sağlam gənc nəsil, ilk növbədə, ölkənin gələcək inkişafı üçün lazımdır

30.12.2025 [20:23]

Toğrul Zeynalov

YAP Ağdam rayon təşkilatının əməkdaşı

Prezident İlham Əliyevin 2025-ci ilin idman yekunlarına həsr olunan mərasimdə etdiyi çıxış Azərbaycan dövlətinin idmana yanaşmasının mahiyyətini, bu sahənin ölkənin ümumi inkişaf strategiyasında tutduğu mühüm yeri və gələcək perspektivlərini əhatəli şəkildə ifadə etmişdir. Cənab Prezident çıxışında xüsusilə vurğulamışdır ki, Azərbaycan idmançılarının il ərzində qazandıqları uğurlar və əldə edilən yüksək nəticələr təsadüfi xarakter daşımır, onlar ardıcıl, sistemli və uzunmüddətli dövlət siyasətinin məntiqi nəticəsidir. Prezident İlham Əliyev beynəlxalq arenalarda qazanılan qələbələri Azərbaycanın artan siyasi, iqtisadi və humanitar nüfuzunun tərkib hissəsi kimi dəyərləndirərək, idmanın ölkənin beynəlxalq imicinin formalaşmasında mühüm rol oynadığını diqqətə çatdırmışdır. Cənab Prezident idmanı yalnız yarış və nəticə anlayışı ilə məhdudlaşdırmayaraq, onu gənc nəslin vətənpərvərlik ruhunda tərbiyə olunması, sağlam həyat tərzinin təşviqi, milli birlik və həmrəyliyin möhkəmləndirilməsi baxımından strateji vasitə kimi təqdim etmişdir. Çıxışda son illərdə ölkə üzrə müasir idman infrastrukturlarının yaradılması, regionlarda idman komplekslərinin inşası, mövcud obyektlərin beynəlxalq standartlara uyğunlaşdırılması və kütləvi idmanın inkişafı dövlət siyasətinin əsas istiqamətləri kimi xüsusi vurğulanmışdır. Prezident İlham Əliyev gənclərin idmana cəlb olunmasını və uşaq-gənclər idman məktəblərinin fəaliyyətinin gücləndirilməsini gələcək qələbələrin təminatı kimi qiymətləndirmiş, bu prosesdə valideynlərin, təhsil müəssisələrinin və yerli qurumların məsuliyyətinə diqqət çəkmişdir. Cənab Prezident məşqçilərin, idman mütəxəssislərinin və federasiyaların rolunu yüksək qiymətləndirərək, peşəkar idarəetmə, şəffaflıq və məsuliyyət prinsiplərinin idmanda uğurun əsas şərti olduğunu qeyd etmişdir. Eyni zamanda, paralimpiya hərəkatının nailiyyətləri, qadın idmanının inkişafı və inklüziv idman siyasəti dövlətin humanist, sosialyönümlü və ədalətli yanaşmasının bariz nümunəsi kimi təqdim olunmuşdur. Prezident İlham Əliyev idmanda ədalətli rəqabətin, təmiz idman prinsiplərinin, antidopinq siyasətinin və etik normaların qorunmasının vacibliyini xüsusi vurğulayaraq, bu sahədə kompromisə yol verilməyəcəyini bildirmişdir. Cənab Prezident müasir idman elminin, rəqəmsal texnologiyaların, tibbi və psixoloji hazırlığın, həmçinin beynəlxalq əməkdaşlığın nəticələrin yüksəldilməsində mühüm rol oynadığını qeyd etmişdir. Çıxışda idmançıların sosial müdafiəsi, onların yarış karyerasından sonrakı həyatlarının təmin olunması və dövlətin idmançıya davamlı dəstəyinin əhəmiyyəti də xüsusi olaraq ön plana çıxarılmışdır. Bütün bu məqamlar Prezident İlham Əliyevin çıxışını təkcə 2025-ci ilin idman yekunlarının ümumiləşdirilməsi deyil, eyni zamanda Azərbaycan idmanının gələcək inkişaf istiqamətlərini müəyyən edən, motivasiyaedici və strateji xarakterli geniş proqram sənədi səviyyəsinə yüksəltmişdir.

Paylaş:

Baxılıb: 426 dəfə