Vaqif Səmədoğlu ömründən yarpaqlar

Bakı:

23 °C

76 %

10 m/s

Əlaqə

AZ RU EN

Ana səhifə / Ədəbiyyat / Vaqif Səmədoğlu ömründən yarpaqlar

Vaqif Səmədoğlu ömründən yarpaqlar

02.02.2015 [15:39]

Vaqif Səmədoğlu 1939-cu il iyun ayının 5-də Bakı şəhərində, böyük şair Səməd Vurğunun ailəsində doğulub. O, 1956-cı ildə Bakıdakı Bülbül adına Musiqi məktəbini bitirib, ardınca Azərbaycan Dövlət Konservatoriyasında fortepiano ixtisası üzrə ali təhsil alıb, bundan sonra isə Moskvada Çaykovski adına Konservatoriyada ixtisas kursu keçib.
Əmək fəaliyyətinə 1963-cü ildən etibarən Azərbaycan Dövlət Konservatoriyasında müəllim olaraq başlayan Vaqif Səmədoğlu, 1968-1973-cü illərdə “Azərbaycan Sovet Ensiklopediyası” Baş redaksiyasında “İncəsənət” şöbəsinin müdiri, 1973-1975-ci illərdə Cəfər Cabbarlı adına “Azərbaycanfilm” Kinostudiyasında ssenarist, 1978-1982-ci illərdə “Yazıçı” nəşriyyatında redaktor, 1982-1985-ci illərdə yenidən Cəfər Cabbarlı adına “Azərbaycanfilm” Kinostudiyasında ədəbi hissə müdiri vəzifələrində çalışıb, 1992-1994-cü illərdə isə “Oğuz eli” qəzetinin baş redaktoru olub.
Vaqif Səmədoğlu 2000 və 2005-ci illərdə olmaq etibarı ilə iki çağırış Azərbaycan Respublikası Milli Məclisinin deputatı seçilib. Həmin dövrdə o, Azərbaycan Parlamentinin Avropa Şurası Parlament Assambleyasındakı nümayəndə heyətinin üzvü olub.
XX yüzilliyin 60-cı illərində ölkədə ədəbi mühitə yeni hava, poetik ovqat gətirən istedadlı sənətkarlardan biri olaraq Vaqif Səmədoğlu, xalqımızın söz xəzinəsinə dəyərli töhfələr verib. Ədəbiyyatşünaslar onun yaradıcılığını “çağdaş Azərbaycan ədəbiyyatında yeni poeziyanın xüsusi mərhələsi” kimi dəyərləndirir.
V.Səmədoğlu qələmindən çıxan əsərlərdə anlam qazanan hər bir ifadə, Azərbaycan xalqının zəngin ədəbi-bədii irsi, milli folklorun geniş imkanları, ənənə ilə novatorluğun vəhdəti, habelə dünya ədəbiyyatının uğurları ilə həmahəngdir, harmoniya içindədir...
Taleyi teatr və kino sənəti ilə qırılmaz tellərlə bağlı olan V.Səmədoğlu, diqqəti taleyüklü üzüntülərə yönəldən əsərləri ilə görkəmli dramaturq şöhrəti qazanıb.
Şair-dramaturq kimliyi ilə yanaşı, Azərbaycançılıq məfkurəsindən çıxış edərək mədəniyyətimizin inkişafı, milli-mənəvi dəyərlərimizin qorunub yaşadılması üçün qüvvə və bacarığını əsirgəməyən V.Səmədoğlu, cəmiyyət yaşamında boy göstərən olaylara, necə deyərlər, peşəkar vətəndaşlıq duyğusu ilə yanaşaraq ictimai xadim kimi də nüfuz qazanıb.
Ədəbi və ictimai-siyasi fəaliyyəti müstəqil dövlətimiz tərəfindən yüksək qiymətləndirilən Vaqif Səmədoğlu, respublikamızın yüksək təltifləri olan “Şöhrət”, “Şərəf” və “İstiqlal” ordenlərinə layiq görülüb.
Çağdaş Azərbaycan ədəbiyyatının, ictimai fikrimizin görkəmli nümayəndəsi, Xalq şairi V.Səmədoğlu 2015-ci il yanvarın 28-də, ömrünün 76-cı ilində vəfat edib. V.Səmədoğlu Fəxri Xiyabanda, atasının yanında torpağa tapşırılıb...

Paylaş:

Baxılıb: 2928 dəfə