Heydər Əliyev yeni azerbaycan logo

Ana səhifə / Siyasət / Ermənistanla sərhəddə yeni hərbi infrastruktur

Ermənistanla sərhəddə yeni hərbi infrastruktur

21.01.2022 [23:46]

Düşməni məğlub etməyimiz arxayınlaşmağa əsas vermir

Nardar BAYRAMLI

Azərbaycanda  ordu quruculuğu prosesi uğurla  davam edir. 44 günlük Vətən müharibəsinin qələbə ilə başa çatmasından sonra da ordunun döyüş imkanlarının artırılması istiqamətində tədbirlər həyata keçirilməkdədir. Xüsusilə, Ermənistanla dövlət sərhədində yeni hərbi hissələr yaradılır, həmin hərbi hissələrin maddi-texniki təchizatı yüksək səviyyədə təmin olunur. 

Bugünlərdə Kəlbəcərdə yeni hərbi obyektlərin istifadəyə verilməsi də bu reallığın göstəricisidir. Müdafiə Nazirliyinin verdiyi məlumata görə, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin göstərişinə əsasən, işğaldan azad edilən ərazilərdə xidmət edən hərbi qulluqçuların döyüş hazırlığının yüksəldilməsi və sosial-məişət şəraitinin yaxşılaşdırılması istiqamətində görülən işlər davam edir: “Müdafiə nazirinin müavini - Maddi-Texniki Təminat Baş İdarəsinin rəisi general-leytenant Nizam Osmanov Kəlbəcər rayonunda yeni istifadəyə verilən modul tipli infrastrukturla tanış olub. Bildirilib ki, hərbi qulluqçuların bütün zəruri ehtiyaclarını təmin etmək məqsədilə yataqxana, yeməkxana, ərzaq anbarı, silah otağı, hamam-sanitar qovşağı mövcuddur. Ərazinin fasiləsiz elektrik enerjisi ilə təmin olunması məqsədilə generatorlar quraşdırılıb. General-leytenant N.Osmanov dövlət sərhədində sərt iqlim şəraitində döyüş növbətçiliyi aparan şəxsi heyətin maddi-texniki təminatı ilə maraqlanıb, onlara xidmətlərində uğurlar arzulayıb”.

Ermənistanla dövlət sərhədində yeni hərbi hissələrin açılmasının əhəmiyyəti ilə bağlı qəzetimizə açıqlama verən Milli Məclisin  Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov bildirib ki, 2020-ci ildə düşməni məğlub etməyimiz bizə arxayınlaşmağa əsas vermir: “Dövlətin özünün təhlükəsizliyinin təmini məqsədilə tədbirlər görülməsi üçün müharibədən sonra - 2021-ci ilin dövlət büdcəsində hərbi xərclərə kifayət qədər üstünlük verdik. Ordumuzun müharibədə istifadə etdiyi hərbi texnika və sursatların yenilənməsi ilə kifayətlənmək olmaz. Müasir dövrlə ayaqlaşmaq, modern silahlanma tempinə uyğun hərəkət etmək lazımdır. Ali Baş Komandan bu sahəyə həmişə diqqət yetirir. Prezident İlham Əliyev xüsusi qeyd edib ki, biz hərbi məqsədlər üçün bir çox silah istehsalçıları ilə yeni müqavilələr bağlamışıq, ordumuzu gücləndirmək üçün xeyli sayda daha müasir silahlar almışıq. Eyni zamanda, Müdafiə Nazirliyi sistemində struktur dəyişikliyi, islahatlar baş verdi. Bir sıra  yerlərdə, xüsusilə Ermənistanla sərhəd bölgələrimizdə yeni sərhəd zastavaları, hərbi hissələr yaradılıb. Onların təminatı çox vacib idi. Ötən ilin sonlarında Hadrut qəsəbəsində komando tipli hərbi hissənin açılışı oldu. Bunların hamısının icrası üçün bizim kifayət qədər ehtiyat vəsaitimiz var idi. Bu da Prezident İlham Əliyevin uzaqgörən tədbirlərinin nəticəsi idi”.

Komitə üzvünün sözlərinə görə, müharibədən sonra ordumuzu möhkəmləndirmək, döyüş qabiliyyətinin daha da yüksəldilməsi üçün ciddi tədbirlər görülməli idi və Azərbaycan bunu edə bildi: “Ordunun daha da güclənməsi məqsədilə  2022-ci ilin dövlət büdcəsində müdafiə xərclərinə əvvəlki ildən daha artıq vəsait ayrılıb. Yəni ordu quruculuğu, müdafiəmiz həmişə ön planda olmalıdır. Dövlət onda güclü olur və dövlətçiliyini qoruyub saxlaya bilir ki, onun müdafiə qüdrəti yüksək səviyyədədir. Ali Baş Komandan da bunu etmək üçün bütün tədbirləri görür, o cümlədən dövlət büdcəmizdə bu prinsip həmişə qorunub saxlanılır və hərbi sahəyə ildən-ilə daha çox vəsait ayrılır. Hazırda Ermənistanla sərhəddə yeni hərbi hissələrin yaradılması, onların təminatının yüksək səviyyədə təmin edilməsi də bu məqsədə xidmət edir”.

Hərbi ekspert Emin Həsənli də bildirib ki, yeni hərbi hissələrin yaradılması Azərbaycan ordusunun gücündən xəbər verir. Onun sözlərinə görə, işğaldan azad edilmiş ərazilərdə hərbi infrastrukturun yaradılması dövlətin qarşısında duran əsas məsələlərdəndir: “Artıq işğaldan azad edilən ərazilərdə hərbi infrastruktur əsasən qurulub. Bu gün Ermənistanla sərhədlərimiz yüksək səviyyədə qorunur, işğaldan azad edilən ərazilərdə yeni hərbi hissələr yaradılır, Silahlı Qüvvələrin strukturuna yenidən baxılır, Azərbaycan üçün yeni olan Komando qüvvələri briqadaları yaradılır. İşğaldan azad edilən ərazilərdə yaradılan hərbi infrastrukturu daha da təkmilləşdirmək, onu yüksək səviyyəyə qaldırmaq  üçün qarşıya böyük vəzifələr qoyulur. Bu məsələlər dövlətin,  Prezident, Ali Baş Komandan İlham Əliyevin diqqətindədir. Dövlət başçısının regionlara, xüsusilə də işğaldan azad edilən ərazilərə səfərləri zamanı hərbi hissələrin açılışında iştirak etməsi, yeni texnikalarla tanış olması onu göstərir ki, Azərbaycan özünün hərbi təhlükəsizliyini həmişə diqqətdə saxlayacaq. Bunun üçün Azərbaycanın kifayət qədər imkanları, dövlətin, dövlət başçısının siyasi iradəsi var.  Hərbi quruculuğu prioritet istiqamət hesab edən dövlət başçısının bu sahənin inkişafına böyük əhəmiyyət verməsi, dünya hərb sahəsindəki bütün yeniliklərin Azərbaycana gətirilməsi üçün göstərdiyi səylər ordumuzun güclənməsinə, ölkəmizin müdafiə qabiliyyətinin artmasına təkan verir. Bütün bunlar Azərbaycanın qarşıdakı illərdə daha da güclənməsinə imkan yaradır”.

Paylaş:
Baxılıb: 207 dəfə

Xəbər lenti

Hamısına bax

Xəbər lenti

Ədəbiyyat

Sosial

Çadradan səmaya

21 May 12:21  

Siyasət

Xəbər lenti

İqtisadiyyat

Siyasət

Prezident bu gün

Prezident bu gün

21 May 09:31

Gündəm

Xəbər lenti

Xəbər lenti

Arxiv
B Be Ça Ç Ca C Ş
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31