Səbail rayonunda şagirdlərə Ulu öndər Heydər Əliyevin zəngin irsinin tədris olunmasının vəziyyəti müzakirə edilib

Bakı:

14 °C

88 %

6 m/s

AZ RU EN

Ana səhifə / Sosial / Səbail rayonunda şagirdlərə Ulu öndər Heydər Əliyevin zəngin irsinin tədris olunmasının vəziyyəti müzakirə edilib

Səbail rayonunda şagirdlərə Ulu öndər Heydər Əliyevin zəngin irsinin tədris olunmasının vəziyyəti müzakirə edilib

15.04.2014 [09:24]

Cari ilin mart-aprel aylarında Səbail rayon İcra Hakimiyyəti (RİH) tərəfindən ümumtəhsil məktəblərində müasir Azərbaycan tarixinin və Ulu öndər Heydər Əliyevin zəngin irsinin daha səmərəli öyrənilməsi məqsədilə XI sinif şagirdləri üçün açıq dərslərin keçirilməsi yüksək səviyyədə təşkil olunub.
Səbail rayon İcra Hakimiyyətinin (RİH) başçısı yanında Şuranın növbəti yığıncağında bununla bağlı müzakirələr aparılıb.
Səbail rayon rəhbərliyinin, Şuranın üzvlərinin, təhsil müəssisələrinin, qəsəbə və sahə ərazi nümayəndəliklərinin, bələdiyyələrin, ictimai təşkilatların və rayon ictimaiyyəti nümayəndələrinin iştirakı ilə keçirilən iclasda rayon İcra Hakimiyyətinin başçısı Asif Əsgərov deyib ki, Prezident İlham Əliyevin diqqət və qayğısının məntiqi nəticəsi olaraq ölkəmizin təhsil sisteminin inkişafında böyük irəliləyişlər əldə olunub. Prezidentin tapşırıqlarına, müvafiq Dövlət proqramlarına uyğun olaraq son illərdə yüzlərlə yeni təhsil müəssisəsi tikilib, əsaslı təmir edilib, lazımi avadanlıq və dərs ləvazimatları ilə təmin olunublar. Son üç il ərzində rayonda yeni məktəb və uşaq bağçası tikilib, digər məktəb və uşaq bağçalarının binaları isə əsaslı təmir olunub. Bütün təhsil müəssisələrində müasir təhsil üçün hər cür şərait yaradılıb.
Açıq dərslərin gedişatı barədə məlumat verən İcra Hakimiyyəti başçısının birinci müavini Xalidə Bayramova bildirib ki, dərslərin yüksək səviyyədə, sistemli və planlı şəkildə keçirilməsi üçün xüsusi cədvəl tərtib olunub, rayonun orta və ali məktəblərinin peşəkarlığı, elmi-nəzəri, metodiki hazırlığı ilə fərqlənən nüfuzlu tarix müəllimləri seçilərək onlar üçün seminar keçirilib. Keçirilən hər bir dərsdə iştirakçılarla yanaşı, rayon İcra Hakimiyyətinin məsul əməkdaşları da iştirak ediblər. Təcrübəli tarix müəllimləri tərəfindən tədris edilən açıq dərslərin hamısı canlı ünsiyyət və şagirdlərin yüksək fəallığı şəraitində keçib, dərslər Azərbaycan və rus bölmələri üzrə aparılıb.
Rayondakı 17 orta təhsil müəssisəsində oxuyan 1268 XI sinif şagirdi də qruplar şəklində dərslərdə iştirak edib. Həmçinin, Səbail rayonunda fəaliyyət göstərən məcburi köçkün məktəblərindən 50-dən artıq XI sinif şagirdi də dərslərə cəlb olunublar.
Açıq dərslərlə yanaşı, fevral ayında 132-134 nömrəli təhsil kompleksinin, mart ayında 49 nömrəli “İntellekt” məktəb-liseyinin, aprel ayında 190 nömrəli orta məktəbin hər birinin 60 nəfər şagirdi Heydər Əliyev Mərkəzində olub. Apreldə isə 189 nömrəli orta məktəbin şagirdlərinin Mərkəzə ekskursiyası nəzərdə tutulub.
Şura iclasında çıxış edən Dövlət İdarəçilik Akademiyasının Həmkarlar İttifaqı Komitəsinin sədri Yusif Ağayev, 132-134 nömrəli təhsil kompleksinin direktoru Sara Xanlarova, 49 nömrəli “İntellekt” məktəb-liseyin direktoru Təhminə Əsədova, Azərbaycan Dövlət İqtisad Universitetinin Yeni Azərbaycan Partiyası ilk təşkilatının sədri Zəfər Bayramov, Azərbaycan Dövlət Pedaqoji Universitetinin prorektoru Rafiq Baxşəliyev və başqaları açıq dərslərin müasir Azərbaycan tarixinin öyrənilməsi baxımından gələcək nəsil üçün əhəmiyyətindən danışıblar.
Şura iclasında həm də Ulu öndər Heydər Əliyevin anadan olmasının 91 illiyi ilə əlaqədar rayonda keçiriləcək tədbirlər barədə məlumat verilib, idarə, təşkilat və təhsil müəssisələrinin üzərinə düşən vəzifələrdən danışılıb.

Paylaş:

Baxılıb: 1107 dəfə