Qarabağ döyüşçüsü İbad Hüseynlinin 45 illik yubileyi qeyd olunub

Bakı:

23 °C

76 %

7 m/s

Əlaqə

AZ RU EN

Ana səhifə / Sosial / Qarabağ döyüşçüsü İbad Hüseynlinin 45 illik yubileyi qeyd olunub

Qarabağ döyüşçüsü İbad Hüseynlinin 45 illik yubileyi qeyd olunub

01.10.2015 [10:34]

Dünən “Hilton” hotelində Azərbaycan hərbçisi, Qarabağ müharibəsi iştirakçısı, “Azərbaycan Bayrağı” ordenli İbad Hüseynlinin 45 illik yubileyi qeyd olunub. Yubiley mərasimində Milli Məclisin deputatları, Qarabağ müharibəsi döyüşçüləri, ziyalılar, Türkiyədən bir sıra qonaqlar iştirak ediblər.
Yubiley mərasimində əvvəlcə torpaqlarımızın azadlığı uğrunda döyüşlərdə qəhrəmanlıqlar göstərmiş İ.Hüseynli ilə bağlı videokadrlar nümayiş etdirilib. Daha sonra çıxışlarda İ.Hüseynlinin qəhrəmanlıqlarından, keçdiyi döyüş yolundan geniş bəhs olunub. Qeyd olunub ki, Dağlıq Qarabağda ilk hərbi toqquşmaların başlandığı zaman, İbad Amurda yerləşən hərbi hissədə Sovet ordusunda qulluq edirdi. Burada o, Sovet ordusunun Bakıya qoşun yeritdiyini və çoxlu sayda həmyerlisinin öldürüldüyünü öyrənib. İ.Hüseynli Azərbaycandan olan digər hərbçilər ilə birlikdə, onların vətənə buraxılması məqsədilə müddətsiz aclıq aksiyasına başlayıb. Komandanlığın ağır təzyiqinə baxmayaraq, onlar aclıq aksiyasını dayandırmayıblar. Nəticədə, rəhbərlik geri çəkilib və indiyə qədər heç yerdə görünməmiş addım atıb - hərbçiləri xidmət müddətinin bitməsinə qədər ehtiyata buraxıb. Bununla da, İbad Azərbaycana qayıtmağı bacarıb.
İbad Hüseynli 1990-cı ildə Azərbaycana qayıtdıqdan sonra öz doğma Xocavənd rayonuna gedib və orada yerli hərbi özünümüdafiə birləşmələri yaratmağa başlayıb. Məhz bu dövrdə Dağlıq Qarabağ münaqişəsinin aktiv fazası başlayıb və qızğın hərbi döyüşlərin getdiyi ərazilərə erməni silahlı qrupları soxulmağa başlayıb. Bu qruplar yerli Azərbaycan əhalisinə qarşı xüsusi qəddarlıqları ilə seçilirdi.
Ermənilərdə regionda yerləşən Sovet ordusundan və ya xaricdən alınmış yetərincə hərbi sursat, təchizat və texniki vardı. İ.Hüseynli və onun döyüş yoldaşlarında isə nə silah almaq, nə də onu haradansa əldə etmək imkanı yox idi. Bu üzdən o, “kəşfiyyat-diversiya dəstəsi” yaradıb və erməni tərəfə keçərək onları məhv edib, çoxlu sayda hərbi silah və təchizatlarını ələ keçirməyə başlayır.
Qeyd olunub ki, 26 dekabr 1993-cü ildə İbad minaya düşərək ağır yaralanıb. Hospitaldan çıxdıqdan dərhal sonra o cəbhə xəttindəki öz hərbi hissəsinə qayıdıb.
2010-cu ildə Bakıda “Azərbaycanfilm” kinostudiyasında İbad Hüseynliyə həsr edilmiş “Əsgər” sənədli filminin təqdimat mərasimi keçirilib. O, 9 oktyabr 1994-cü ildə Azərbaycan Respublikasının “Azərbaycan Bayrağı” ordeni ilə təltif edilib.
Çıxışlarda bildirilib ki, İ.Hüseynli qardaş Türkiyədə də yaxşı tanınır və onun Qarabağ döyüşlərində qəhrəmanlığı yüksək qiymətləndirilir. Məhz bunun nəticəsidir ki, 2015-ci il aprelin 28-də Türkiyənin Ankara şəhərində İ.Hüseynlinin adına küçə, avqustun 30-da isə Qaziantepdə adına park verilib. Qarabağ döyüşçüsünə göstərilən bu diqqət Azərbaycan-Türkiyə dostluğunun bariz nümunəsidir.
N.BAYRAMLI

Paylaş:

Baxılıb: 835 dəfə