Böyük imkanlar, geniş hədəflər

Bakı:

27 °C

39 %

2 m/s

Əlaqə

AZ RU EN

Ana səhifə / YAP xəbərləri / Böyük imkanlar, geniş hədəflər

Böyük imkanlar, geniş hədəflər

29.12.2024 [11:14]

Meydanəli Yolçiyev,

YAP Daşkəsən rayon təşkilatının sədri

Dekabrın 24-də 2024-cü ilin idman yekunlarına həsr olunmuş tədbirdə Azərbaycan Respublikasının Prezidenti, Milli Olimpiya Komitəsinin Prezidenti İlham Əliyev çıxış edərək idmançılarımızın uğurlarını vurğulamış və gələcək hədəfləri müəyyən etmişdir. Bu çıxış Azərbaycan idmanının hazırkı vəziyyətini, nailiyyətlərini və perspektivlərini əks etdirən mühüm mesajlarla zəngin idi.

Dövlətimizin başçısı qeyd etdi ki, 2024-cü il Azərbaycan idmanı üçün əlamətdar il olub. Bu il ərzində Azərbaycan idmançıları beynəlxalq yarışlarda böyük uğurlar əldə edərək təxminən 1700 medal qazanıblar. Bu nəticə ölkəmizin idman sahəsindəki inkişafını və yeni nəsil idmançıların yetişməsini göstərir. Cənab İlham Əliyev Azərbaycan idmanının beynəlxalq aləmdə gücünü təsdiqlədiyini, xüsusilə Yay Olimpiya Oyunlarında tarixdəki ən yüksək yerini qazandığını bildirib. Azərbaycan komanda hesabında 30-cu yeri tutaraq, 1996-cı ildən bu yana Olimpiya Oyunlarında ən yüksək nəticəsini əldə edib. Bununla yanaşı, müsəlman ölkələri arasında da üçüncü yerə layiq görülməsi Azərbaycanın idman sahəsindəki gücünü və təcrübəsini ortaya qoyur.

Prezident İlham Əliyev idmanın və idman qələbələrinin cəmiyyətdə böyük rolu olduğunu və xüsusilə gənc nəslin yetişdirilməsində, vətənpərvərlik hisslərinin aşılanmasında əhəmiyyətini vurğulayıb. Azərbaycan gənclərinin fiziki və mənəvi cəhətdən güclü olmalarını təmin edən idman dövlətin inkişafı və müstəqilliyi üçün önəmli bir vasitədir.

Dövlət başçısı idman infrastrukturu sahəsində Azərbaycanın əldə etdiyi irəliləyişlərdən də bəhs etmişdir. Hazırda ölkənin müxtəlif bölgələrində 44 Olimpiya İdman Kompleksi fəaliyyət göstərir. Azərbaycanın müasir idman infrastrukturu, xüsusilə Bakıda inşa edilmiş Olimpiya Stadionu beynəlxalq tədbirlərin keçirilməsi üçün geniş imkanlar yaratmışdır. Azərbaycanın idman infrastrukturu yalnız paytaxtla məhdudlaşmır, azad edilmiş Qarabağ bölgəsində də yeni idman obyektlərinin inşası sürətlə davam edir. Bu obyektlər bölgələrin həm fiziki, həm də mənəvi bərpasında böyük əhəmiyyət daşıyır.

2025-ci ildə Azərbaycanda keçiriləcək MDB Oyunlarına hazırlıq məsələsinə də toxunan cənab İlham Əliyev Gəncə şəhərindəki infrastrukturun modernləşdirilməsindən və yeni stadionların inşasından danışıb. Bu Oyunlar 7 min idmançının iştirak etməsi ilə ölkəmizin idman sahəsindəki potensialını bir daha dünya səviyyəsində nümayiş etdirəcək. Gəncə MDB Oyunlarının mərkəzi olacaq və burada şəhər infrastrukturu yenilənəcək, yeni idman obyektləri istifadəyə veriləcək.

Mərasimdə Azərbaycan Prezidentinin idman sahəsindəki xidmətləri ilə tanınan şəxsləri təltif etməsi də diqqətə layiqdir. İdmançılara və idman mütəxəssislərinə Fəxri fərmanlar, medallar və yeni mənzillər təqdim edib. Bu addımlar dövlətin idmançılarına göstərdiyi qayğı və dəstəyin bariz nümunəsidir. Dövlətin idmana olan dəstəyi ölkənin idman sahəsindəki inkişafını təmin edən ən vacib faktorlardan biridir.

Prezident İlham Əliyevin çıxışı və bu mərasim Azərbaycanın idman sahəsindəki yüksək nailiyyətləri və gələcək inkişaf perspektivlərini bir daha ortaya qoydu. Azərbaycan idman dövlətinə çevrilmək yolunda ardıcıl olaraq mühüm addımlar atır və bu, yalnız beynəlxalq arenada deyil, eyni zamanda gənc nəslin vətənpərvərlik ruhunda yetişdirilməsində əvəzsiz rol oynayır. Bu uğurlar Azərbaycan idmanının gələcəkdə daha da inkişaf edəcəyinə və dünya miqyasında mövqeyini gücləndirəcəyinə əminlik yaradır.

Paylaş:

Baxılıb: 387 dəfə