26 İyun – Qürurumuzun və Gücümüzün Günü

Bakı:

23 °C

81 %

9 m/s

Əlaqə

AZ RU EN

Ana səhifə / YAP xəbərləri / 26 İyun – Qürurumuzun və Gücümüzün Günü

26 İyun – Qürurumuzun və Gücümüzün Günü

25.06.2025 [11:18]

Hər millətin tarixində elə günlər var ki, onlar təkcə təqvimdə bir tarix deyil, xalqın ruhunun, dözümünün və mübarizliyinin simvoluna çevrilir. Azərbaycan xalqı üçün belə günlərdən biri də 26 İyundur – Silahlı Qüvvələr Günü. Bu tarix təkcə ordu quruculuğunun başlanğıcı deyil, eyni zamanda müstəqillik, güc və vətən sevgisinin rəmzidir.

Əsrlər boyu yadelli hücumlara sinə gərmiş bu torpaq, daim qəhrəman övladları ilə fəxr etmişdir. 1918-ci ilin məhz bu günü Azərbaycan Xalq Cümhuriyyəti tərəfindən ilk milli ordu – Əlahiddə Azərbaycan Korpusu yaradıldı. Cümhuriyyətin qısa ömrünə baxmayaraq, bu ordu həm milli ruhun, həm də dövlətçiliyin bünövrəsinə çevrildi.1918-ci ilin 26 iyununda Azərbaycan Xalq Cümhuriyyəti tərəfindən yaradılan Milli Ordu, xalqımızın azadlıq və müstəqillik yolundakı ilk ciddi addımı idi. Hərçənd bu müstəqillik cəmi 23 ay davam etsə də, xalqın yaddaşında ordu quruculuğu fikri heç zaman ölmədi. Bu tarixi miras 1991-ci ildə yenidən müstəqilliyini bərpa edən Azərbaycan Respublikasının Silahlı Qüvvələrinin əsasını təşkil etdi. Hər bir dövlətin suverenliyi onun ordusu ilə ölçülür. Bizim ordumuz – təkcə silah gücü ilə deyil, ruh gücü ilə də qalibdir. 44 günlük Vətən müharibəsi bunu bir daha sübut etdi. Azərbaycan əsgəri düşmən qarşısında təkcə torpağını deyil, öz ləyaqətini, milli qürurunu da qorudu. O, dağlarda şəhid olan qardaşının iziylə getdi, düzənliklərdə alnı açıq irəlilədi, tarixə öz qanı ilə imza atdı.Bu gün Azərbaycan Silahlı Qüvvələri – təkcə hərbi qüvvə deyil, xalqın iradəsini daşıyan bir iradə mərkəzidir. Onların sədaqəti, nizam-intizamı və vətənpərvərliyi – sabitliyimizin və gələcək əmin-amanlığımızın zəmanətidir.
26 İyun təkcə ordunun günü deyil, həm də xalqın ordusuna sevgisinin, güvəninin günüdür. Bu gün biz əsgərə bir təşəkkür borcluyuq. Təşəkkür edirik ki, onun sayəsində rahat nəfəs alır, azad torpaqda sabaha ümidlə baxırıq. Təşəkkür edirik ki, o, vətəni canı bahasına qoruyur, sülhün və təhlükəsizliyin keşiyində dayanır. Ordumuz təkcə müharibə meydanlarında deyil, həyatın hər sahəsində xalqla birlikdədir. Təbii fəlakətlər zamanı köməyə gələn əsgər, sərhəddə gözünü qırpmadan keşik çəkən zabit, məktəblilərə vətənpərvərlik öyrədən hərbi qulluqçu – hamısı bir amalın xidmətindədir: vətəni qorumaq! Bu gün minlərlə azərbaycanlı gənc orduda xidmət etməklə fəxr edir. Valideynlər övladlarını əsgərliyə yola salarkən həm nigaran, həm də qürurlu olurlar. Çünki bilirlər ki, onların övladı müqəddəs bir vəzifənin – Vətənə xidmətin icraçısıdır. 26 İyun – yalnız əsgərlərin deyil, həm də xalqın bayramıdır. Çünki bu ordu xalqın arasından çıxır, xalqın sevgisi ilə böyüyür, xalqın duaları ilə güclənir. Və hər dəfə bayraq yüksəldikcə, qəlbimizdə bir səda ucalır: "Vətən sağ olsun!"

Səfa Ağayev,
YAP İmişli rayon təşkilatının sədri

Paylaş:

Baxılıb: 509 dəfə