26 Avqust – Laçın Şəhəri Günü: Cənnətə çevrilən doğma torpaq

Bakı:

11 °C

87 %

7 m/s

Əlaqə

AZ RU EN

Ana səhifə / YAP xəbərləri / 26 Avqust – Laçın Şəhəri Günü: Cənnətə çevrilən doğma torpaq

26 Avqust – Laçın Şəhəri Günü: Cənnətə çevrilən doğma torpaq

25.08.2025 [23:14]

26 Avqust Azərbaycan xalqı üçün təkcə bir təqvim tarixi deyil – bu gün həm də Laçının qürurla geri qayıtdığı, zəfərin simvollarından birinə çevrildiyi gündür. Laçın Şəhəri Günü artıq hər il müstəqilliyimizi, ərazi bütövlüyümüzü və milli iradəmizi təcəssüm etdirən simvolik bir tarixə çevrilmişdir. Bu gün həm də qələbəmizin bərpa, quruculuq və dirçəliş mərhələsinə keçidinin canlı sübutudur. 44 günlük Vətən müharibəsində əldə olunan şanlı Zəfərdən sonra Azərbaycan torpaqları, o cümlədən Laçın rayonu işğaldan azad edildi. Azərbaycan Respublikasının Prezidenti İlham Əliyev işğaldan azad olunmuş ərazilərə səfərləri zamanı verdiyi vədləri ardıcıl şəkildə həyata keçirməklə, bu torpaqlarda həyatın tam mənası ilə yenidən doğulmasını təmin edir. Prezident İlham Əliyevin Laçın şəhərinə səfəri zamanı söylədiyi fikirlər bu günün əhəmiyyətini bir daha vurğulayır: “Biz öz doğma torpaqlarımızı işğalçılardan azad edəndən sonra mən demişdim ki, Qarabağı və Şərqi Zəngəzuru cənnətə çevirəcəyik. Cənnətin əgər təsviri varsa, bu gün bax, budur. Gözəl təbiət, əzəmətli dağlar, gözəl binalar, evlər – hər şey çox böyük zövqlə yaradılır ki, həm insanlar burada rahat yaşasınlar, həm də Laçın şəhərinin müasir siması Azərbaycanın əldə etdiyi uğurlarla eyni səviyyədə olsun.”

Bu sözlər bir dövlət başçısının təkcə siyasi qətiyyətini deyil, həm də doğma yurda olan sarsılmaz sevgisini, vətəndaşlarına verdiyi yüksək dəyəri ifadə edir. Laçının bu günkü inkişafı isə deyilənlərin real təcəssümüdür. Burada aparılan abadlıq-quruculuq işləri, müasir infrastrukturun qurulması, yol-nəqliyyat şəbəkəsinin inkişafı, məktəblər, xəstəxanalar və digər sosial obyektlərin tikintisi bölgəni yeni bir həyatla təmin edir.

Laçın artıq təkcə keçmişin xatirələrində yaşayan bir şəhər deyil. O, bu gün öz sakinlərinə qayıdan, onlara rifah bəxş edən, çağdaş Azərbaycanın tərəqqi simvoluna çevrilən bir məkandır. Bu proses təkcə Laçına deyil, bütün Qarabağ və Şərqi Zəngəzura aiddir – burada aparılan bərpa işləri, “Böyük Qayıdış” proqramı çərçivəsində həyata keçirilən tədbirlər, kəndlərin və şəhərlərin yenidən salınması Azərbaycanın əzmini və gələcəyə olan inamını əks etdirir.

Laçın artıq cənnətə çevrilməkdədir – təbiəti, mədəniyyəti, tarixi və bu günün müasirliyi ilə. Bura qayıdan hər bir sakin bunu həm görür, həm də yaşayır. Bu, yalnız fiziki bir qayıdış deyil, həm də mənəvi qayıdışdır – milli ruhun öz yurduna dönməsi, haqqın və ədalətin bərpa olunmasıdır.

Bu möhtəşəm dirçəlişin təməlində dayanan əsas amillər – Prezident İlham Əliyevin uzaqgörən siyasəti, xalq-dövlət birliyi və vətənpərvərlik ruhudur. Laçın şəhərinin bugünkü siması sübut edir ki, Azərbaycan öz torpaqlarında əbədi və daimi sahibdir. İndi Laçın yalnız keçmişin xatirələrini deyil, həm də gələcəyin ümidlərini yaşadır.

Nicat Quliyev,

Yeni Azərbaycan Partiyası Laçın rayon təşkilatının məsləhətçisi

Paylaş:

Baxılıb: 318 dəfə