Azərbaycanın sülh və təhlükəsizlik siyasəti Kəlbəcərdə dayanıqlı inkişafın təməlini qoyur

Bakı:

21 °C

64 %

5 m/s

Əlaqə

AZ RU EN

Ana səhifə / YAP xəbərləri / Azərbaycanın sülh və təhlükəsizlik siyasəti Kəlbəcərdə dayanıqlı inkişafın təməlini qoyur

Azərbaycanın sülh və təhlükəsizlik siyasəti Kəlbəcərdə dayanıqlı inkişafın təməlini qoyur

26.08.2025 [15:24]

Biz bu il 44 günlük Vətən müharibəsində əldə edilmiş möhtəşəm Qələbənin beşinci ildönümünü böyük tarixi qürurla qeyd edirik. Beş il öncə Müzəffər Ali Baş Komandan İlham Əliyevin rəhbərliyi ilə Azərbaycan Ordusu düşməni darmadağın edərək torpaqlarımızı işğaldan azad etdi və milli ədaləti bərpa etdi. Bu Zəfər yalnız hərbi uğur deyil, həm də xalqımızın iradə birliyinin, milli qətiyyətinin və ərazi bütövlüyünə sarsılmaz inamının ifadəsidir. Qələbədən sonra Azərbaycanın qarşısında duran əsas vəzifələrdən biri işğaldan azad olunmuş ərazilərin dirçəldilməsi, keçmiş məcburi köçkünlərin doğma yurdlarına təhlükəsiz qayıdışının təmin edilməsi və bölgədə dayanıqlı sülhün təmin olunması idi. Bu məqsədlə həyata keçirilən ardıcıl siyasət nəticəsində Kəlbəcər və Ağdərə rayonlarında genişmiqyaslı bərpa və quruculuq işləri aparılıb. Müasir yollar, sosial obyektlər, elektrik stansiyaları istifadəyə verilib, kəndlərin bərpasına başlanılıb. “Böyük Qayıdış” Proqramı çərçivəsində azad olunan ərazilərə qayıdan sakinlər üçün hər cür şərait yaradılıb. 2023-cü ilin sentyabrında həyata keçirilmiş lokal xarakterli antiterror əməliyyatları ilə Qarabağda qeyri-qanuni silahlı birləşmələr tərksilah edilib, konstitusiya quruluşu bərpa olunub və dövlət suverenliyi təmin edilib.

Prezident İlham Əliyevin və birinci xanım Mehriban Əliyevanın Kəlbəcər və Ağdərəyə səfərləri Böyük Qayıdış proqramının ardıcıl mərhələsi olmaqla yanaşı, azad olunmuş ərazilərdə gedən inkişafın və vətəndaş rifahının dövlət siyasətinin mərkəzində dayandığını göstərdi. Bu səfərlər zamanı ilk olaraq Toğanalı-Kəlbəcər-İstisu avtomobil yolunda görülən işlər, Kəlbəcər şəhərində yaşayış komplekslərinin təməli, Murovdağ tunelinin inşası, su elektrik stansiyalarının açılışı və digər mühüm infrastruktur layihələri ictimaiyyətə təqdim olundu. Prezident İlham Əliyev Kəlbəcər və Ağdərə sakinləri ilə görüşlərində bölgədə sülh, təhlükəsizlik və inkişafın təmin edildiyini qeyd etdi.

Böyük Qayıdış Proqramı çərçivəsində artıq ilk yaşayış kompleksi istifadəyə verilib və yaxın illərdə dörd yaşayış massivində 10 min nəfərin məskunlaşması planlaşdırılır. Bu, sadəcə məskunlaşma deyil, həm də ədalətin, xalqın iradəsinin və tarixi qələbənin təntənəsidir. Dövlət başçısının vurğuladığı kimi, Kəlbəcərə qayıdış xalqımızın dözümünün və mübarizliyinin parlaq təcəssümüdür.

Beləliklə, Kəlbəcər və Ağdərə bu gün Qələbənin, təhlükəsizliyin, sülhün və dirçəlişin birgə simvoluna çevrilib. Böyük Qayıdış layihəsi çərçivəsində azad olunmuş ərazilərimizin dünyanın ən inkişaf etmiş bölgələrindən birinə çevrilməsi istiqamətində inamla irəliləyirik. Azərbaycan qalib dövlət kimi qarşıya qoyduğu hədəfləri uğurla həyata keçirir, bölgədə sülh və sabitliyi təmin edərək gələcək nəsillərə parlaq bir tarix və firavan həyat miras qoyur.

Namiq Əhmədov,

YAP Xəzər rayon təşkilatının sədri

Paylaş:

Baxılıb: 438 dəfə