Zəngilan Şəhər Günü – Qələbənin və yenidənqurulmanın rəmzi

Bakı:

23 °C

76 %

7 m/s

Əlaqə

AZ RU EN

Ana səhifə / YAP xəbərləri / Zəngilan Şəhər Günü – Qələbənin və yenidənqurulmanın rəmzi

Zəngilan Şəhər Günü – Qələbənin və yenidənqurulmanın rəmzi

20.10.2025 [15:50]

Zəngilan rayonu 1993-cü ildə Ermənistan silahlı qüvvələri tərəfindən işğal edilmişdi. Otuz ilə yaxın müddət ərzində bu torpaqlar dağıntılara, vandalizmə və talana məruz qalmışdı.

Azərbaycanın qədim və zəngin tarixə malik bölgələrindən biri olan Zəngilan rayonu 2020-ci il 44 günlük Vətən müharibəsi zamanı düşmən işğalından azad olundu. 20 oktyabr 2020-ci il tarixində Azərbaycan Ordusu Zəngilan şəhərini və rayonun bir sıra kəndlərini işğaldan azad etdi. Bu tarixi gün sonradan “Zəngilan Şəhər Günü” kimi qeyd olunmağa başladı.

Zəngilanın azad edilməsi həm strateji, həm də mənəvi baxımdan mühüm hadisə idi. Bu qələbə Cəbrayıl və Qubadlı istiqamətlərində aparılan əməliyyatların uğurlu nəticəsi olaraq, Azərbaycan Ordusunun Zəngəzur dəhlizi istiqamətində irəliləməsinə şərait yaratdı. Eyni zamanda, Zəngilanın azadlığı Qarabağ və Şərqi Zəngəzurun tam bərpası yolunda mühüm mərhələ oldu.

Zəngilan bu gün Böyük Qayıdış proqramının əsas mərkəzlərindən biridir. Burada ağıllı şəhər və kənd konsepsiyası əsasında yeni infrastruktur, müasir yaşayış kompleksləri, məktəblər, xəstəxanalar və sənaye müəssisələri inşa olunur. Prezident İlham Əliyev və Birinci vitse-prezident Mehriban Əliyeva dəfələrlə Zəngilanda olublar, yeni layihələrin açılışında iştirak ediblər. Xüsusilə Ağalı “ağıllı kəndi” Azərbaycanın müasir inkişaf modelinin rəmzinə çevrilib.

Hər il 20 oktyabr tarixində Zəngilanın azad edilməsi münasibətilə müxtəlif tədbirlər keçirilir. Bu tədbirlərdə şəhidlərimizin ruhu yad olunur, qazilərimizə hörmət göstərilir, həmçinin şəhərin bərpası və inkişafı ilə bağlı yeni layihələr təqdim edilir. Zəngilan şəhər günü həm də birliyin, dövlətçiliyin və qalib Azərbaycan xalqının qürur simvoluna çevrilib.

Azərbaycan xalqının yaddaşına qızıl hərflərlə yazılan 20 oktyabr 2020-ci il tarixi Zəngilanın işğaldan azad olunduğu gündür. Həmin gün təkcə bir rayonun azad edilməsi deyil, həm də Azərbaycan Ordusunun qəhrəmanlıq salnaməsinin yeni səhifəsi idi.

Hazırda Zəngilan rayonunda Zəngilan Beynəlxalq Hava Limanı, Zəngilan Yaşıl Enerji Zonası, Araz Vadisi İqtisadi Zonası və böyük avtomobil yolları və körpülər inşa edilir. Bütün bunlar Prezident İlham Əliyevin rəhbərliyi ilə regionun iqtisadi və ekoloji cəhətdən dayanıqlı inkişaf strategiyasının bir hissəsidir.

Zəngilan bu gün yenidən müasir, güclü və yaşıl şəhərə çevrilərək Azərbaycan xalqının zəfər tarixinin canlı simvoluna dönür.

Eldar Əsədov,

YAP Tərtər rayon təşkilatının sədri

Paylaş:

Baxılıb: 575 dəfə