YAP Gənclər Birliyinin “Yay məktəbi” layihəsinə start verilib

Bakı:

14 °C

72 %

8 m/s

Əlaqə

AZ RU EN

Ana səhifə / YAP xəbərləri / YAP Gənclər Birliyinin “Yay məktəbi” layihəsinə start verilib

YAP Gənclər Birliyinin “Yay məktəbi” layihəsinə start verilib

08.07.2014 [10:26]

Siyavuş Novruzov: Yeni Azərbaycan Partiyası gəncliyin inkişafına böyük önəm verir
Məlum olduğu kimi, Azərbaycanda gənclərə diqqət və qayğı dövlətin siyasətində prioritet istiqamətlərdəndir. Gəncləri Azərbaycanın gələcəyi kimi dəyərləndirən Ulu öndər Heydər Əliyevin əsasını qoyduğu siyasəti davam etdirən Prezident İlham Əliyev bildirir ki, müasirləşmə, yeniləşmə dövlət siyasətinin düzgün qurulmasından, eyni zamanda, gənclərin fəaliyyətindən asılıdır.
Yeri gəlmişkən, ölkəmizin ictimai-siyasi həyatında aparıcı rol oynayan Yeni Azərbaycan Partiyasının (YAP) sıralarında birləşən 600 mindən artıq üzvün 40 faizini gənclərin təşkil etməsi də onlara olan diqqət və qayğıdan qaynaqlanır. Gənclərin partiyaya axını onların Heydər Əliyev ideyalarına sədaqətlərini, Prezident İlham Əliyevin siyasətinə inamlarını ifadə etməklə yanaşı, bir daha bu reallığı da təsdiqləyir ki, gənclər YAP-ın sıralarına qoşulmaqla öz potensiallarından səmərəli istifadə etmək, dövlətə, dövlətçiliyə xidmət etmək üçün böyük meydan görürlər.
Ümumiyyətlə, YAP rəhbərliyi gənclərin siyasi fəallığının artırılmasına, asudə vaxtlarının səmərəli təşkilinə, beynəlxalq əlaqələrin genişlənməsinə, ümumiyyətlə ayrı-ayrı sahələr üzrə müxtəlif layihələrin həyata keçirilməsinə xüsusi diqqət yetirir. Bu layihələr sırasında 2007-ci ildən başlayaraq hər il keçirilən yay və qış liderlik məktəblərini xüsusi qeyd etmək yerinə düşər. Sözügedən layihələrin əsas məqsədi Azərbaycan ərazisində yaşayan bütün gənclərin bir-birini daha yaxından tanımasını, onların arasında səmimi münasibətlərin yaradılmasını, ölkədə ictimai həyatın istənilən sahəsində dinamik inkişaf haqqında onlara dolğun məlumatların çatdırılmasını, tanınmış siyasətçilərlə gənclərin görüşlərinin təşkil edilməsini, gələcəkdə müxtəlif sahələrdə çalışacaq bu gənclərdə liderlik kimi mühüm xüsusiyyətlərin formalaşdırılmasını təmin etməkdir.
Qeyd edək ki, artıq Yeni Azərbaycan Partiyası Gənclər Birliyinin növbəti “Yay məktəbi” layihəsinə start verilib. Bununla bağlı iyulun 5-də YAP Mərkəzi Aparatında toplantı keçirilib. Tədbirdə YAP İcra katibinin müavini, Milli Məclisin deputatı Siyavuş Novruzov, “İki sahil” qəzetinin baş redaktoru, YAP Siyasi Şurasının üzvü Vüqar Rəhimzadə, YAP Gənclər Birliyinin sədr müavini, partiyanın Siyasi Şurasının üzvü Samirə Quliyeva, YAP Gənclər Birliyi ofisinin əməkdaşları və layihənin ilk mərhələsində yer alacaq gənclər iştirak ediblər.
Toplantıda çıxış edən YAP İcra katibinin müavini Siyavuş Novruzov hər il həyata keçirilən “Yay məktəbi” layihəsinin məqsədinin gənclərin biliklərinin möhkəmləndirilməsi, istirahətinin səmərəli təşkili olduğunu qeyd edib: “Yeni Azərbaycan Partiyası gəncliyin inkişafına böyük önəm verir. Gənclərlə bağlı layihələr də gənclərin inkişafına xidmət edir. “Yay məktəbi” kimi layihələr vasitəsilə gənclərin potensialı, bacarıqları üzə çıxarılır”.
S.Novruzov bildirib ki, gənc siyasətçilərin formalaşmasında da bu tipli layihələr vacib rol oynayır.
Ölkəmizdə uğurlu dövlət gənclər siyasətinin həyata keçirildiyini deyən YAP İcra katibinin müavini partiyamızın bu siyasətin reallaşmasında yaxından iştirak etdiyini diqqətə çatdırıb. Onun sözlərinə görə, bu il “Yay məktəbi” layihəsi daha da geniş şəkildə təşkil olunacaq. “Belə ki, iyulun 6-dan başlayaraq 800 gənc 6 mərhələdə Lerik və Oğuzda “Yay məktəbi”ndə iştirak edəcək. Burada Bakı şəhəri ilə yanaşı, regionlardan olan gənclər də iştirak edəcək. Layihə çərçivəsində nəzərdə tutulmuş proqrama görə, gənclərin ictimai-siyasi şəxslər və region gəncləri ilə görüşləri, müxtəlif idman yarışları, intellektual oyunlar, musiqili şənliklər və s. təşkil olunacaq. Layihənin icrası partiyanın rəhbər şəxslərinin nəzarətində olacaq. Ancaq “Yay məktəbi”ndə əsas iş gənclərə həvalə olunub” - deyə, YAP İcra katibinin müavini vurğulayıb.
S.Novruzov gənclərə layihə çərçivəsində nəzərdə tutulan proqramdan kənara çıxmamağı və intizam qaydalarına ciddi əməl etməyi tövsiyə edib. O, gənclərin və xanımların ölkənin ictimai-siyasi həyatında rolunun daha da artırılması istiqamətində YAP-ın daima işlər apardığını, qarşıdan gələn bələdiyyə seçkiləri zamanı daha çox gənclər və xanımların namizədliyinin irəli sürüləcəyini vurğulayıb.
Daha sonra tədbir iştirakçılarına layihənin proqramı haqqında məlumatlar verilib. Qeyd edək ki, tədbir çərçivəsində YAP GB-nin ofisinin yeni rəhbəri Əli Pənahov gənclərə təqdim olunub.
Nardar BAYRAMLI

Paylaş:

Baxılıb: 964 dəfə