Zəfər forumunun növbəti ünvanı Ağdam rayonu olub

Bakı:

21 °C

65 %

12 m/s

Əlaqə

AZ RU EN

Ana səhifə / YAP xəbərləri / Zəfər forumunun növbəti ünvanı Ağdam rayonu olub

Zəfər forumunun növbəti ünvanı Ağdam rayonu olub

28.10.2022 [12:03]

Biləsuvardan start götürən Zəfər forumunun növbəti ünvanı oktyabrın 27-də Ağdam rayonu olub. Bərdə, Tərtər, Ağcabədi, Laçın, Xocalı, İmişli, Zərdab, Beyləqan, Xocavənd və Füzuli rayonlarını əhatə edən Zəfər forumu Ağdam Muğam Mərkəzində təşkil olunub. Forumda Prezident Administrasiyasının məsul əməkdaşları, Ağdam Rayon İcra Hakimiyyətinin başçısı Vaqif Həsənov, YAP Ağdam Rayon təşkilatının sədri Mansur Quliyev və aparatın əməkdaşları, Müdafiə Nazirliyinin rəsmiləri, şəhid ailələrinin üzvləri, müharibə iştirakçıları, Azərbaycan Ordusunun hərbi qulluqçuları, qeyri-hökumət təşkilatları və ictimaiyyət nümayəndələri iştirak ediblər. Qonaqlar tədbirdən öncə Ulu Öndər Heydər Əliyevin abidəsi önünə gül dəstələri düzüb, Şəhidlər xiyabanını ziyarət ediblər. Əməkdar incəsənət xadimi polkovnik Abdulla Qurbaninin moderatorluq etdiyi tədbirdə Ulu Öndər Heydər Əliyevin və şəhidlik zirvəsinə ucalan Vətən övladlarının xatirəsi bir dəqiqəlik sükutla yad edilib, hərbi orkestrin müşayiəti ilə Dövlət Himni ifa olunub. Ağdam Rayon İcra Hakimiyyətinin başçısı Vaqif Həsənov forum iştirakçılarını salamlayıb. Bütün xalqımız kimi, ağdamlıların da hər zaman Heydər Əliyev ideyalarına sadiq olduqlarını qeyd edib, Azərbaycan Prezidenti, Müzəffər Ali Baş Komandan cənab İlham Əliyevin rəhbərliyi altında həm ön cəbhədə, həm də arxa cəbhədə göstərdikləri fədakarlıq və igidliklərdən söhbət açıb. Növbəti Zəfər forumunun Ağdamda keçirilməsini rayon sakinlərinə göstərilən böyük etimad kimi dəyərləndirib və bundan sonra da Vətənə, xalqa, dövlətə sadiq vətəndaşların yetişdirilməsi üçün səylərini əsirgəməyəcəklərini bildirib.

Prezident Administrasiyasının Qeyri-hökumət təşkilatları ilə iş və kommunikasiya sektorunun müdiri Vüsal Quliyev 44 gün davam edən Vətən müharibəsində qazanılan Qələbənin tarixi əhəmiyyətindən danışıb. Bu Qələbənin xalqımızın birliyinin, həmrəyliyinin, dövlətimizin iqtisadi gücünün, rəşadətli ordumuzun əsgər və zabitlərinin qəhrəmanlıq və şücaətinin, Ulu Öndər Heydər Əliyevin əsasını qoyduğu azərbaycançılıq məfkurəsinin, Azərbaycan-Türkiyə qardaşlığının və cənab Prezident İlham Əliyevin sərkərdəlik məharətinin, qətiyyətinin, hücum diplomatiyasının və dəmir yumruğunun Qələbəsi olduğunu qeyd edib.

Tədbir çərçivəsində “Əsgərə Məktub” layihəsi də həyata keçirilib. Bərdə, Tərtər, Ağcabədi, Laçın, Xocalı, İmişli, Zərdab, Beyləqan, Xocavənd və Füzuli rayonlarından olan şəhid ailələrinin üzvləri, müharibə iştirakçıları və müvafiq qurumların nümayəndələri çıxış edərək, Müzəffər Ali Baş Komandanın Azərbaycanın ərazi bütövlüyü naminə əmrlərinə hər an hazır olduqlarını bildiriblər. YAP Ağdam rayon təşkilatının əməkdaşı, XTQ mənsubu, qazi Toğrul Zeynalov Forum iştirakçılarını salamlamış və Forum iştirakçıları adından Azərbaycan Respublikasının Prezidenti cənab İlham Əliyevə ünvanlanmış müraciətin mətnini diqqətə çatdırmışdır. Müraciətdə cənab Prezident İlham Əliyevə xalqımıza Zəfər sevincini yaşatdığına görə dərin ehtiram ifadə olunub. Nümayəndə heyətlərinə Müdafiə Nazirliyinin adından A.Qurbaninin “Böyük gələcəyə baxış” və “Vətən müharibəsi şəhidləri” adlı kitabları hədiyyə edilib.

Paylaş:

Baxılıb: 606 dəfə