“Bu kiçik qələbəmizi Xocalı soyqırımı qurbanlarının xatirəsinə həsr edirik”

Bakı:

26 °C

63 %

11 m/s

Əlaqə

AZ RU EN

Ana səhifə / İdman / “Bu kiçik qələbəmizi Xocalı soyqırımı qurbanlarının xatirəsinə həsr edirik”

“Bu kiçik qələbəmizi Xocalı soyqırımı qurbanlarının xatirəsinə həsr edirik”

27.02.2018 [09:55]

Azərbaycan güləşçiləri Ukraynanın paytaxtı Kiyevdə keçirilən XXII beynəlxalq turnirdə uğur qazanıblar
Xəbər verildiyi kimi, Ukraynanın paytaxtı Kiyevdə görkəmli güləşçi və məşqçilərin xatirəsinə həsr olunmuş sərbəst, yunan-Roma və qadın güləşi üzrə XXII beynəlxalq turnir başa çatıb. 37 ölkədən 500-dək idmançının iştirak etdiyi turnirdə yığma komandamızın üzvləri 9 qızıl, 6 gümüş və 4 bürünc medal qazanıblar. Yunan-Roma güləşi üzrə yığmamız turniri 4 qızıl, 2 gümüş və 2 bürünc medalla başa vurub. Eldəniz Əzizli (55 kq), Murad Məmmədov (60 kq), Taleh Məmmədov (63 kq) və Rafiq Hüseynov (82 kq) bütün rəqiblərindən üstün olaraq turnirin qızıl medalını qazanıblar. İslam Abbasov (87 kq) və Sabah Şəriəti (130 kq) isə yalnız final görüşündə uduzaraq gümüş medalla kifayətləniblər. Elvin Mürsəliyev (82 kq) və Orxan Nuriyev (97 kq) turnirin bürünc medalına sahib olublar.
Sərbəst güləşçilərimiz isə 4 qızıl, 3 gümüş və 1 bürünc medal əldə ediblər. Georgi Edişeraşvili (57 kq), Əhmədnəbi Qvarzatilov (61 kq), Şərif Şərifov (92 kq) və Nurməhəmməd Hacıyev (97 kq) fəxri kürsünün ən yüksək pilləsinə qalxıblar. Hacı Əliyev (65 kq), Murtuz Müslümov (70 kq) və Cəbrayıl Həsənov (79 kq) turnirin gümüş medalına sahib olublar. Bürünc medalı isə yığmamıza Əfqan Xaşalov (57 kq) qazandırıb.
Qadın güləşçilərimiz turnirdə 1 qızıl, 1 gümüş və 1 bürünc medala layiq görülüblər. Tatyana Omelçenko (62 kq) bütün rəqiblərini üstələyərək turnirin qızıl medalını qazanıb. Yalnız final görüşündə uduzan İrina Netreba (65 kq) gümüş medalla kifayətlənib. Alyona Kolesnik (57 kq) isə yarışı üçüncü pillədə başa vurub.
Azərbaycan Güləş Federasiyasının I vitse-prezidenti Firdovsi Umudov güləşçilərimizin ilin əvvəlindən hazırlıqlarını maksimum keyfiyyətlə başa vurduqlarını və qarşıdan gələn yarışlarda da uğurla çıxış etməyi hədəflədiklərini bildirib. F.Umudov Ukraynada keçirilən turnirdə iştirakın da hazırlığın tərkib hissəsi olduğunu dilə gətirib: “Turnirə qədər Qazaxıstan və Türkmənistan yığmaları ilə birgə iki təlim-məşq toplanışı keçirmişik. Komandalarımız Avropa çempionatına qədər daha bir neçə təlim-məşq toplanışına qatılacaq. Sərbəst güləş yığmamız aprelin əvvəlində Dünya Kubokunda mübarizə aparacaq. Bu turnirin yekunlarına görə həm Dünya Kuboku, həm də bütün komandalar üzrə Avropa çempionatına yollanacaq heyəti müəyyənləşdirəcəyik. Turnir həm də çatışmazlıqları görmək üçün əhəmiyyətli idi”.
Federasiya rəsmisi güləşçilərimizdən Qalib Əliyev, Taleh Məmmədov, Elvin Mürsəliyev, Həsən Əliyev, Orxan Nuriyev və İslam Abbasovun turnirdə Ermənistan təmsilçiləri ilə qarşılaşdıqlarını, bu görüşlərin beşini də qələbə ilə başa vurduqlarını deyib. Bildirilib ki, bu görüşlər zamanı pəhləvanlarımız əzmkarlığı, qətiyyətli mübarizəsi ilə yadda qaldılar: “Onların bu əzmkarlığı arenaya toplaşmış azarkeşlər tərəfindən də alqışlarla qarşılandı. Təbii ki, rəqabət yalnız idman müstəvisində aparıldı. İdmanda rəqibə qarşı qərəz yolverilməzdir. Ancaq düşmən ölkənin idmançıları ilə mübarizədə biz ikiqat artıq motivasiya olur, bəzən lazımından artıq güc sərf edirik ki, qalib gələk. Bu turnirdə belə görüşlərin beşində qalib gəldik. Bu kiçik qələbəmizi Xocalı soyqırımı qurbanlarının xatirəsinə həsr edirik. İdmanı siyasətdən uzaq tutmaq istəsək də, bəzən milli məsələlərdə buna göz yummaq lazım gəlir. Hansı idman növü olursa olsun, idmançılarımızın erməni rəqibləri ilə qarşılaşmada meydanı başı uca tərk etmələri hər bir Azərbaycan vətəndaşını sevindirir, qürurlandırır. Bu gün bu idmançılarımız öz əzmkarlıqları ilə rəqiblərinə qalib gəliblər. Bu turnir artıq başa çatdı. Yarışda udmaq da var, uduzmaq da. Bu qələbə də artıq geridə qaldı. Bir məsələ var ki, Xocalı soyqırımının ildönümü ərəfəsində bizim erməni rəqiblərimizə uduzmağa mənəvi haqqımız yox idi. Bu qalibiyyət üçün güləşçilərimizə təşəkkür edirəm. Əminik ki, cənab Ali Baş Komandanın başçılığı altında tezliklə haqq-ədalət öz yerini tapacaq və biz əzəli torpaqlarımızı işğaldan azad edəcəyik”.
PƏRVİZ

Paylaş:

Baxılıb: 1142 dəfə