Aİ-nin Cənubi Qafqazla bağlı bütün layihələri Azərbaycanın iştirakı olmadan reallaşmır

Bakı:

10 °C

93 %

5 m/s

Əlaqə

AZ RU EN

Ana səhifə / Siyasət / Aİ-nin Cənubi Qafqazla bağlı bütün layihələri Azərbaycanın iştirakı olmadan reallaşmır

Aİ-nin Cənubi Qafqazla bağlı bütün layihələri Azərbaycanın iştirakı olmadan reallaşmır

19.09.2009 [14:02]

Mübariz Qurbanlı: İndiki halda Ermənistanın Qafqaz bölgəsində Aİ səviyyəsində müəyyən olunmuş bu və ya digər layihələrdə iştirakı mümkün deyil
Məlum olduğu kimi, bir neçə gün öncə Avropa İttifaqına (Aİ) üzv dövlətlərin xarici işlər nazirləri Cənubi Qafqaz ölkələri ilə bağlı müzakirələr aparıblar. Bu müzakirələr haqqında müxtəlif ehtimallar irəli sürülməkdədir. Məsələyə münasibət bildirən YAP İcra katibinin müavini, millət vəkili Mübariz Qurbanlı hesab edir ki, Azərbaycan Avropa İttifaqı ilə əlaqələrin genişləndirilməsinin tərəfdarıdır. “Yeni Qonşuluq Siyasəti” çərçivəsində təşkilatla əməkdaşlıq edilir və tərəflər arasında indiyədək bir sıra sənədlər imzalanıb.
Onun sözlərinə görə, bu gün Cənubi Qafqazda iqtisadi potensialına, demokratik inkişafına görə Azərbaycan Aİ-yə daha yaxın ölkə hesab olunmaqdadır. M.Qurbanlı qeyd edib ki, Aİ-nin bölgə ilə bağlı bütün layihələri Azərbaycanın iştirakı olmadan reallaşmır. ölkəmizin həm coğrafi mövqeyi, həm iqtisadi islahatlar, dövlətin demokratik inkişaf yolunda atdığı addımlar Aİ-nin Azərbaycana marağını daha da artırıb: “Əsas hədəflərdən biri iqtisadi inteqrasiyanı dərinləşdirməkdir. O da məlumdur ki, tarixi İpək Yolunun üzərində yerləşən Azərbaycan Aİ-nin Şərq-Qərb nəqliyyat dəhlizi və iqtisadi layihələrı proqramında mühüm yer tutmaqdadır. Aİ-nin Cənubi Qafqazla bağlı bütün tədbirlərində, aparılan danışıqlarda Azərbaycana xüsusi diqqət yetirilir. Azərbaycanın da mövqeyi Prezident İlham Əliyevin apardığı siyasətdə özünü göstərir. Biz Avropaya nə qədər lazımıqsa, Avropa da bizə o qədər lazımdır. Bizim başlıca prinsipimiz budur. Yəni, Aİ ilə əməkdaşlıq naminə Azərbaycan öz milli maraqlarından bir addım da geri çəkilməyəcək. Aİ ilə əlaqələr Azərbaycanın maraqları çərçivəsində qurulur. Kimlərsə Avroatlantik məkana inteqrasiyanı sürətləndirmək naminə milli maraqlarımızdan geri çəkilməyi təbliğ edirlərsə, bu, yolverilməzdir. Əməkdaşlıqda tarazlıq gözlənilməlidir. Azərbaycan ərzaq, enerji, milli təhlükəsizliyini təmin etmək iqtidarında olan ölkədir, bölgənin lider dövlətidir”.
M.Qurbanlı vurğulayıb ki, Azərbaycan Aİ-yə üzv ölkələrlə ikitərəfli əlaqələri sürətlə inkişaf etdirir. Eyni zamanda, Aİ-nin Şərq-Qərb, Şimal-Cənub nəqliyyat dəhlizləri ilə bağlı layihələrində yaxından iştirak edir.
YAP İcra katibinin müavini hesab edir ki, Avropa strukturlarının qapılarını gedib döymək yox, bu qapıların bizim üçün daim açılmasına şərait yaratmaq lazımdır. Bu da artıq mövcuddur. Bu, Avropa Şurasında, Aİ-də və Avroatlantik məkanın təhlükəsizlik çətiri olan NATO ilə münasibətlərdə də özünü göstərir. Onun sözlərinə görə, Aİ ilə münasibətlər ümumi xarici siyasətimizin bir hissəsi olaraq həyata keçirilir və burada tarazlıq gözlənilir.
Ermənistanın NABUCCO layihəsinə qoşulacağı barədə məlumatlara gəlincə, M.Qurbanlı xatırladıb ki, bugünlərdə ölkəmizdə səfərdə olan Aİ-nin enerji məsələləri üzrə komissarı məsələyə aydınlıq gətirib. “Mövqe bundan ibarət olub ki, təşkilata üzv ölkələrin xarici işlər nazirlərinin toplantısında Ermənistanın NABUCCO layihəsinə qoşulması məsələsi müzakirə olunmayıb. ümumiyyətlə, Aİ-nin Cənubi Qafqazda həyata keçirdiyi layihələrdə Azərbaycanın mövqeyi əsas rol oynayır. Ermənistan işğal etdiyi torpaqlarımızı azad etməyincə, bölgədə reallaşan hər hansı layihədə iştirak edə bilməyəcək”, - deyə YAP İcra katibinin müavini vurğulayıb. Onun sözlərinə görə, indiki halda Ermənistanın Qafqaz bölgəsində Aİ səviyyəsində müəyyən olunmuş bu və ya digər layihələrdə iştirakı mümkün deyil. çünki Ermənistanın coğrafi mövqeyi hansısa layihənin Azərbaycandan yan keçməklə reallaşmasına şərait yaratmır. NABUCCO layihəsinin bu gün diqqət mərkəzində olduğunu deyən millət vəkili Azərbaycanın neft və qazla zəngin bir ölkə olduğunu xatırladıb. “Neft və qazı xarici bazarlara çıxarmaq üçün 7 boru kəməri var. Yəni, Azərbaycan bu məhsulları çoxşaxəli ixrac etmək imkanına malikdir”, - deyə M.Qurbanlı bildirib.
NARDAR

Paylaş:

Baxılıb: 1155 dəfə