Dinamik iqtisadi inkişafla yoxsulluq səviyyəsini endirməyə nail olmuşuq

Bakı:

8 °C

66 %

6 m/s

Əlaqə

AZ RU EN

Ana səhifə / YAP xəbərləri / Dinamik iqtisadi inkişafla yoxsulluq səviyyəsini endirməyə nail olmuşuq

Dinamik iqtisadi inkişafla yoxsulluq səviyyəsini endirməyə nail olmuşuq

14.02.2025 [17:33]

Rövşən Əhmədov,

YAP Ağcabədi rayon təşkilatının sədri

Azərbaycan sürətli inkişaf yolunda olan, qlobal məsələlərin müzakirəsində yaxından iştirak edən, dünyanın müxtəlif siyasi-iqtisadi qütbləri ilə fəal əməkdaşlıq həyata keçirən bir dövlətdir.

Azərbaycanın Davos Forumunda təmsil olunması, Prezident İlham Əliyevin Forum çərçivəsində görüşləri, dünya dövlətlərinin və aparıcı media qurumlarının ölkə başçısına üstün marağı ölkəmizin beynəlxalq aləmdə əvəzedilməz rolu və mövqeyinin təzahürüdür.

Azərbaycan Respublikasının Prezidenti cənab İlham Əliyev yanvarın 20-də Davosda Çinin CGTN telekanalına müsahibəsində ölkəmizin hədəflərini, eyni zamanda, Azərbaycanın iqtisadi gücünü dəqiq şərh edərək həm respublikamız, həm də beynəlxalq gündəm üçün həlledici olan bir çox mövzulara toxunub.

Müsahibəsində ölkəmizin əldə etdiyi nailiyyətlərdən danışan Prezident İlham Əliyev vurğulayıb ki, “Azərbaycanın müxtəlif mühitlərdə özünü rahat hiss etməsinin əsas amillərindən biri ondan ibarətdir ki, biz üzərimizə düşənlərlə əlaqədar artıq xeyli iş görmüşük. Biz sabit iqtisadiyyat qurmuşuq, sabit siyasi sistemimiz var, insanların yaşayış səviyyəsini yaxşılaşdıran çoxlu sosial proqramlar həyata keçiririk, yoxsulluq səviyyəsini təxminən 5 faizə endirməyə nail olmuşuq”.

Dinamik sosial-iqtisadi inkişaf tempinə malik olan Azərbaycanın əldə etdiyi nailiyyətlərin əsas xüsusiyyətlərindən biri yaşanan tərəqqinin ölkə əhalisinin həyatında da öz əksini tapmasıdır. Bunun nəticəsidir ki, hər keçən il ölkəmizdə insanların yaşayış səviyyəsi yüksəlməkdə, əldə etdikləri maddi gəlirlərin həcmi artmaqdadır. Azərbaycanın iqtisadi cəhətdən daha qüdrətli ölkəyə çevrilməsi yoxsulluq səviyyəsinin də sürətlə azalmasına təkan verərək bu sahədə qazanılan uğurların miqyasına görə ölkəmizin dünya dövlətləri cərgəsində seçilənlər sırasında yer almasını şərtləndirib, həyata keçirilən uğurlu iqtisadi siyasət nəticəsində əhalinin gəlirlərinin artması və rifah halının əhəmiyyətli dərəcədə yaxşılaşması fonunda yoxsulluq səviyyəsinin azalma tempi digər dünya dövlətləri ilə müqayisədə xeyli yüksək olub.

Ölkə başçısı müsahibəsində bildirib ki, müstəqilliyimiz bərpa ediləndən bəri olduğumuz yerdəyik. Biz güclü iqtisadiyyat, yeri gəlmişkən, özünü təmin edən iqtisadiyyat qurduq. Ümumi daxili məhsula nisbətdə xarici borcun səviyyəsi çox aşağıdır, cəmi 6,9 faizdir. Buna əsaslanaraq, biz regionda bağlantılar yaradan genişmiqyaslı layihələr həyata keçirmişik və aid olduğumuz Cənubi Qafqaz və Xəzər regionunda etibarlı mövqe tutmuşuq.

Çin və Azərbaycanın rəsmi olaraq strateji tərəfdaş olduğunu vurğulayan Prezident İlham Əliyev qeyd etdi ki, “ötən yay mənim Çinin Sədri ilə görüşümdən sonra strateji tərəfdaşlıq üzrə müvafiq Bəyannamə qəbul edildi və bu, bizim ikitərəfli əlaqələrdə çox mühüm siyasi addımdır. Strateji tərəfdaşlıq çox yüksək səviyyəli qarşılıqlı etimad, əməkdaşlıq deməkdir və biz təkcə Ümumdünya Ticarət Təşkilatına deyil, müxtəlif beynəlxalq təşkilatlara qoşulma məsələsi daxil olmaqla Çin ilə tərəfdaşlığımızın genişləndirilməsini arzulayırıq”.

Azərbaycan və Çin arasında münasibətlər hər iki ölkənin strateji maraqlarına uyğun olaraq inkişaf etməkdədir. İqtisadi, siyasi və mədəni əməkdaşlıq sahələrində gözlənilən artım gələcəkdə daha da sıx əlaqələrin qurulmasına münbit şərait yaradacaq.

Paylaş:

Baxılıb: 329 dəfə