Azad Laçın - tarixi Zəfərimizdir

Bakı:

25 °C

59 %

6 m/s

Əlaqə

AZ RU EN

Ana səhifə / YAP xəbərləri / Azad Laçın - tarixi Zəfərimizdir

Azad Laçın - tarixi Zəfərimizdir

03.04.2023 [15:05]

Regionun vacib yaşayış məntəqəsi hesab edilən, ölkəmizin ən böyük rayonlarından biri və çox böyük potensialı olan Laçının işğaldan azad olunması tarixi Zəfərimizin ən mühüm hadisələrindən biridir. Mütəxəssislərin yekdil fikirləri deməyə əsas verir ki, Şərqi Zəngəzur iqtisadi rayonuna daxil olan Laçına qayıdış həm də mühüm iqtisadi nailiyyətlərə yol açacaqdır.

Mart ayının 28-də Möhtərəm Prezidentimiz cənab İlham Əliyev Məsim Məmmədovun Prezidentin Şərqi Zəngəzur iqtisadi rayonuna daxil olan Laçın rayonunda xüsusi nümayəndəsi təyin edilməsi ilə əlaqədar onu qəbul edərək bu rayonun gələcək inkişafi, işğaldan azad edildikdən sonra burada görülən işlər, həyata keçirilən və nəzərdə tutulan layihələrdən ətraflı danışdı, eyni zamanda mühüm və vacib məsələlərə toxunaraq, lazımi tapşırıqlarını verdi.

Möhtərəm Prezidentimiz çıxışının əvvəlində qeyd etdi ki, Laçın rayonu 28 il işğal altında idi və bu işğal dövründə rayonun, demək olar ki, bütün infrastrukturu Ermənistan tərəfindən məhv edilmişdir, ətraf mühitə böyük ziyan vurulmuşdur. Bütövlükdə meşə fondumuzun qanunsuz istismarı nəticəsində 60 min hektar meşə sahəsi ermənilər tərəfindən məhv edilib, kəsilib, talanıb, satılıbdır. Onun böyük hissəsi Laçın rayonunda olan meşə fonduna aiddir. İşğal dövründə ermənilər həm də Laçında qanunsuz məskunlaşma siyasəti aparmışlar. Xaricdə yaşamış ermənilər həm Laçın şəhərinə, həm də bir neçə kəndə gətirilmiş və orada yerləşdirilmişlər. Əlbəttə ki, bütün bunlar beynəlxalq konvensiyalara görə hərbi cinayət sayılır. Əfsuslar olsun ki, Ermənistan dövləti bu hərbi cinayətə görə hələ də məsuliyyətə cəlb edilməmişdir.Bütün bunlara baxmayaraq Laçın rayonuna qayıdacaq keçmiş məcburi köçkünlər bundan sonra Laçında rahat yaşamalıdırlar və Azərbaycan dövləti bunu təmin etmək üçün bütün lazımi addımları atır. Dövlət Başçımız bildirdi ki, “Biz Laçını həm döyüş meydanında, həm siyasi yollarla qaytardıq. İkinci Qarabağ müharibəsi dövründə Laçın rayonunun işğaldan azad edilməsi əsas vəzifələrdən biri idi və biz faktiki olaraq Laçın rayonunun cənub hissəsini döyüşərək, vuruşaraq azad etdik. Güləbird və digər bir neçə kənd döyüş meydanında azad edilmişdir, biz Laçın - Xankəndi yoluna çıxmışdıq. Məhz bu əməliyyat nəticəsində, eyni zamanda, Şuşa şəhərinin erməni işğalçılarından azad edilməsi faktiki olaraq Ermənistan dövlətinin kapitulyasiyasına gətirib çıxarmışdır. Vaxtilə “Qarabağ Ermənistandır” deyən Ermənistan rəhbərliyi öz məğlubiyyətini qəbul etməyə məcbur olmuşdur və 2020-ci ilin noyabrın 10-da kapitulyasiya aktı Ermənistan tərəfindən imzalandı. Laçın rayonunun digər hissəsi - ən böyük hissə artıq siyasi yollarla azad edilmişdir. Bu, bizim böyük tarixi Zəfərimizdir.” Möhtərəm Prezidentimiz xüsusilə bildirdi ki, uzun illər aparılmış danışıqlar əsnasında hər zaman vasitəçilər Laçın rayonuna hansısa xüsusi bir yanaşma sərgiləyirdilər və Ermənistan bütövlükdə Laçın rayonunun Azərbaycana qaytarılmasını qəbuledilməz sayırdı. Halbuki onlar digər rayonlardan da çıxmaq fikrində deyildilər. İndi - müharibədən iki il yarım keçəndən sonra bu, hər kəsə daha aydın oldu. Beynəlxalq vasitəçilər - ATƏT-in o vaxtkı Minsk qrupu danışıqların aparılması ilə faktiki olaraq bu işğalı möhkəmləndirməyə çalışırdılar. İndi hər şey aydın oldu - Fransanın Azərbaycana bu ədalətsiz və mənfi münasibəti təsadüfi deyil. Sadəcə olaraq, işğal dövründə bunu müəyyən dərəcədə pərdələmək istəyirdilər, sadəcə olaraq, bizi çaşdırmaq istəyirdilər. Amma baxın, müharibədən – İkinci Qarabağ müharibəsindən keçən iki il yarım ərzində bizə qarşı hansı çirkin əməllər törədilir, hansı əsassız ittihamlar irəli sürülür. Yəni, bütün bunlar göz qabağındadır, o cümlədən Avropa Parlamentinin Azərbaycana qarşı qəbul etdiyi bir sıra qətnamə yenə də ermənipərəst, rüşvətxor və anti-Azərbaycan qruplaşmanın məhsuludur və burada aparıcı rolu Fransa deputatları oynayır. İşğal dövründə də biz bunu təbii ki, hiss edirdik, amma bu dərəcədə yox. Təsəvvür edə bilməzdik ki, ölkələr bu dərəcədə riyakar, yalançı ola bilərlər. Adamın üzünə baxıb bir söz deyə, arxada başqa iş görə bilərlər.

Ölkə başçısının rəhbərliyi ilə bu gün Laçın rayonunda genişmiqyaslı quruculuq işləri həyata keçirilir. Laçında beynəlxalq hava limanı inşa edilir, Kəlbəcər - Laçın yolunun yenidən qurulması aparılır, Göygöl rayonundan Şərqi Zəngəzura yol çəkilir, Qubadlı - Laçın yolu da sürətlə inşa edilir. Laçın şəhərində Heydər Əliyev Fondunun xətti ilə məscid inşa ediləcəkdir.

Günümüzün reallıqları onu deməyə əsas verir ki, Möhtərəm Prezidentimizin rəhbərliyi və qətiyyəti ilə işğaldan azad edilmiş bütün ərazilər o cümlədən Laçın rayonu tez bir zamanda bərpa olunacaq və sürətlə inkişaf etdiriləcəkdir.

Ədalət Hüseynov

YAP Qazax rayon təşkilatı ərazi partiya təşkilatının sədri

Paylaş:

Baxılıb: 487 dəfə