İslamofob dairələrin ölkəmizə qarşı apardığı kampaniya iflasa məhkumdur

Bakı:

15 °C

88 %

1 m/s

Əlaqə

AZ RU EN

Ana səhifə / Siyasət / İslamofob dairələrin ölkəmizə qarşı apardığı kampaniya iflasa məhkumdur

İslamofob dairələrin ölkəmizə qarşı apardığı kampaniya iflasa məhkumdur

31.03.2015 [09:43]

Azərbaycanın əldə etdiyi uğurlardan narahat olan antimilli mərkəzlər yenidən demokratiya və insan haqları pərdəsi altında “qara piar” kampaniyasına start veriblər
Kimsəyə sirr deyil ki, cəmi 24 illik müstəqillik tarixinə malik müasir Azərbaycan dövləti bu qısa zamanda böyük uğurlara imza atmaqla yerləşdiyi Cənubi Qafqaz regionunun lider dövlətinə çevrilib. Azərbaycan dövlətinin bu uğurlarının mərkəzində dayanan əsas amil isə istər daxili, istərsə də xarici arealda sabit, milli maraqlara söykənən, vətəndaşlarının hüquq və azadlıqlarının genişləndirilməsini özündə əks etdirən, həmçinin, əlaqələrin normal və tərəfdaşlıq çərçivəsində inkişafına nail olan siyasətin həyata keçirilməsidir. Məhz bu, Azərbaycanın siyasi-iqtisadi inkişafı ilə yanaşı, ölkəmizin beynəlxalq aləmdə yaxın tərəfdaş, etibarlı müttəfiq kimi tanınmasında əhəmiyyətli rola malik olub.
Onu da qeyd edək ki, Azərbaycan hakimiyyətinin yürütdüyü xarici siyasət kursunun aydın və səmimi olması nəticə etibarı ilə dünya tərəfindən təqdir edilir. Eyni zamanda, ölkəmiz illərdir ki, bir sıra mühüm beynəlxalq tədbirlərin ev sahibi kimi çıxış edir. Əksər böyük dövlətlərin, təşkilatların rəhbərləri, nümayəndələri məhz dünyanın qarşılaşdığı problemlərdən çıxış yollarını Bakıda təşkil olunan tədbirlərdə müzakirə edirlər. Bu, həm də ölkəmizin beynəlxalq aləmdəki nüfuzunun, hər zaman diqqət mərkəzində olmağımızın göstəricisi sayıla bilər. Bundan başqa, Azərbaycan bu gün dinlərarası, mədəniyyətlərarası dialoqların da əsas mərkəzinə çevrilib.
Bir sözlə, beynəlxalq miqyaslı mədəniyyət, idman tədbirlərinin ölkəmizdə keçirilməsi ənənəyə çevrilib. Məsələn, bir neçə il öncə “Eurovision” mahnı yarışmasına uğurla ev sahibliyi edən Azərbaycan dövləti cəmi bir neçə aydan sonra birinci Avropa Oyunlarının keçiriləcəyi məkan olacaq.
Lakin təəssüflə vurğulanmalıdır ki, dövlətimizin bu uğurlu inkişafı, dünyanın mədəni, idman tədbirlərində fəal çıxışı, o cümlədən, bu tədbirlərə ev sahibliyi etməklə əldə olunan uğurların dünya ictimaiyyətinə təqdimatı bəzi islamofob, antimilli, ermənipərəst dairələrin böyük narahatlıqlarına səbəb olur. Zaman-zaman fəallaşaraq ölkəmizə qarşı ikili standartlardan çıxış edən, demokratiya və insan haqları adı altında “qara piar” kampaniyasını həyata keçirməyə çalışan bu islamofob mərkəzlər indi də ölkəmizdə birinci Avropa Oyunlarının keçirilməsi ilə bağlı aparılan yüksəksəviyyəli fəaliyyətə kölgə salmaq üçün növbəti yalanları uyduraraq cəmiyyətə sırımağa cəhd göstərirlər. Daha dəqiq desək, bu anti-azərbaycançı, islamofob dairələrin rəhbərliyi altında olan və özünü “demokratik təşkilat” adlandıran qurumlar Azərbaycana qarşı hər zaman ikili standartla yanaşır, ölkəmizdə gedən demokratik prosesləri düzgün dəyərləndirmirlər.
Adıçəkilən mərkəzlərin transmilli mediadan istifadə etməklə ölkəmizə qarşı apardığı “qara piar” kampaniyası isə hər zamankı kimi iflasa məhkumdur. Azərbaycan dövləti hər zaman bu cür kampaniyalara layiqli cavab verib və öz uğurları ilə onların yalanlarını ifşa edib. Bu mənada, birinci Avropa Oyunlarına qarşı həmin islamofob dairələrin apardığı kampaniyanın da özündən əvvəlkilərin aqibətini yaşayacağına şübhə yoxdur.
Pərviz SADAYOĞLU

Paylaş:

Baxılıb: 611 dəfə