YAP-ın Sədr müavini – İcra katibi Əli Əhmədov Astara rayonunda partiya fəalları ilə görüş keçirib

Bakı:

4 °C

65 %

8 m/s

AZ RU EN

Ana səhifə / YAP xəbərləri / YAP-ın Sədr müavini – İcra katibi Əli Əhmədov Astara rayonunda partiya fəalları ilə görüş keçirib

YAP-ın Sədr müavini – İcra katibi Əli Əhmədov Astara rayonunda partiya fəalları ilə görüş keçirib

04.07.2013 [01:52]

Əli Əhmədov: Yeni Azərbaycan Partiyası iqtidara gəldiyi gündən indiyədək sübut edib ki, onun dayağı xalqdır, xalqın güvəndiyi, ümid etdiyi partiyadır
Yeni Azərbaycan Partiyasının (YAP) Sədr müavini-İcra katibi, Milli Məclisin deputatı Əli Əhmədov iyulun 3-də Astara rayonunda YAP fəalları ilə görüş keçirib. Görüşdə oktyabr ayında keçiriləcək prezident seçkiləri ilə bağlı fikir mübadiləsi aparılıb, qarşıda duran vəzifələr müzakirə edilib.
www.yap.org.az saytının məlumatına görə, görüşdə YAP Astara rayon təşkilatının sədri Firudin Əhmədov görülən işlər və qarşıda duran əsas vəzifələr barədə məruzə edib. Bildirib ki, rayon təşkilatı 150 ərazi ilk təşkilatında 6104 nəfər üzvü birləşdirir. Bunlardan 2289 nəfəri qadın, 2548 nəfəri gənclərdir. Azərbaycan xalqının Ümummilli lideri Heydər Əliyevin 90 illik yubileyi respublikanın hər yerində olduğu kimi, Astarada da böyük təntənə ilə qeyd edilib. YAP rayon təşkilatının təsdiq etdiyi tədbirlər planına uyğun olaraq bütün ərazi təşkilatlarında, yaşayış məntəqələrində yubiley tədbirləri keçirilib. Rayonda ilk dəfə olaraq Ümummilli lider Heydər Əliyevin 90 illik yubileyinə həsr olunmuş beynəlxalq elmi konfrans baş tutub. Konfransda respublikamızın tanınmış alimləri ilə yanaşı, Hindistan, Türkiyə, Özbəkistan, Rusiyadan gəlmiş elm xadimləri iştirak ediblər.
Məruzəçi bu ilin oktyabr ayında ölkəmizdə keçiriləcək prezident seçkilərinə hazırlıq işləri, bu məqsədlə partiya üzvləri arasında aparılan iş bölgüsü barədə də ətraflı məlumat verib. F.Əhmədov partiya üzvlərinin, bütövlükdə rayon seçicilərinin yekdilliklə Yeni Azərbaycan Partiyasının Sədri İlham Əliyevin namizədliyini dəstəkləyəcəklərini bildirib.
Fəallarla görüşdə çıxış edən YAP-ın Sədr müavini - İcra katibi Əli Əhmədov ölkəmizdə həyata keçirilən sosial-iqtisadi layihələrdən və son on ildə qazanılan uğurlardan danışıb. Bildirib ki, ölkəmizdə həyata keçirilən məqsədyönlü tədbirlər nəticəsində əhalinin həyat şəraiti ilbəil yaxşılaşır. İcra katibi bütün bu uğurlara əsası Ulu öndər Heydər Əliyev tərəfindən qoyulan siyasətin Prezident İlham Əliyev tərəfindən uğurla davam etdirilməsi nəticəsində nail olunduğunu bildirib.
Ə.Əhmədov çıxışında qeyd edib ki, “hakimiyyətin mənbəyi xalqdır” ifadəsi bu gün daha aktual səslənir. Çünki qarşıdan prezident seçkiləri gəlir və seçkidə iştirak edən bütün siyasi qüvvələr yalnız xalqa söykəndiyi haqda fikir yürüdürlər. Amma Yeni Azərbaycan Partiyası iqtidara gəldiyi gündən indiyədək sübut edib ki, onun dayağı xalqdır, xalqın güvəndiyi, ümid etdiyi partiyadır.
Partiyanın Sədr müavini əlavə edib ki, siyasi partiyalar bütün zamanlarda xalqa söykənməli, xalqa arxalanmalı və xalqın dəstəyini qazanmalıdır: “Bu gün “Milli şura” adı altında meydana artılan qüvvələrin xalqın dəstəyindən məhrum olduqları gerçəklikdir. Məhz buna görə də, “Milli şura” adlı qurumda təmsil olunanlar xarici qüvvələrə sığınıblar və onların diqtəsi ilə hərəkət edirlər. Xalqa söykənməyən qüvvə məhvə məhkumdur və onların heç bir gələcəyi yoxdur. Azərbaycan xalqı belə qüvvələri heç vaxt dəstəkləməyəcək”.
YAP-ın İcra katibi çıxışı zamanı gənclərə öz tövsiyələrini də verib. Bildirib ki, fəal gənclərin, qadınların potensialından, ziyalı insanların və ictimaiyyət arasında böyük nüfuza malik ağsaqqalların qüvvəsindən maksimum istifadə olunmalıdır.
Tədbirdə rayon Ağsaqqallar Şurasının sədri Hamlet Əliyev, YAP Astara rayon təşkilatı Qadınlar Şurasının sədri Aygül Məmmədova və rayon İcra Hakimiyyətinin başçısı Qəzənfər Ağayev çıxış edərək dövlət başçısının rəhbərliyi altında həyata keçirlən kompleks tədbirlərdən danışıblar. Astaralıların qarşıdan gələn prezident seçkilərində İlham Əliyevə yekdilliklə səs verəcəklərini bildiriblər.

Paylaş:

Baxılıb: 1322 dəfə