Azərbaycan qadınına verilən yüksək dəyər

Bakı:

16 °C

63 %

9 m/s

Əlaqə

AZ RU EN

Ana səhifə / YAP xəbərləri / Azərbaycan qadınına verilən yüksək dəyər

Azərbaycan qadınına verilən yüksək dəyər

06.03.2026 [21:19]

Qadın – həyatın başlanğıcı, mərhəmətin ünvanı, ailənin mənəvi dayağıdır. O, ilk laylanı oxuyan, ilk sözü öyrədən, övladının qəlbinə vətən sevgisini, insanlıq duyğusunu aşılayan müqəddəs varlıqdır. Ana olmaq qadının ən ali missiyası, cəmiyyətin isə mənəvi təməlidir. Çünki sağlam əqidəli, vətənpərvər və savadlı nəslin formalaşması bilavasitə ananın tərbiyəsi ilə bağlıdır.

Azərbaycan qadını tarix boyu yalnız ailə çərçivəsində deyil, ictimai-siyasi həyatın müxtəlif sahələrində də mühüm rol oynamışdır. O, zərifliyi ilə yanaşı gücü, səbir və iradəsi ilə seçilmiş, cəmiyyətin inkişafında fəal iştirak etmişdir. Məhz bu xüsusiyyətlər Azərbaycan qadınını həm ailədə, həm də dövlət quruculuğu prosesində etibarlı dayağa çevirmişdir.

Müstəqil Azərbaycan Respublikasında qadının rolu daha da genişlənmiş, onun hüquq və azadlıqlarının təmin olunması dövlət siyasətinin prioritet istiqamətlərindən birinə çevrilmişdir. Bu gün Azərbaycan qadınları istər təhsil, səhiyyə və elm sahəsində, istərsə də dövlət idarəçiliyi və siyasətdə fəal mövqe tuturlar. Milli Məclisdə və digər dövlət qurumlarında qadınların təmsilçiliyi artmaqdadır. Onların peşəkarlığı, məsuliyyəti və təşəbbüskarlığı ölkənin sosial-iqtisadi inkişafına mühüm töhfə verir.

Qadın hüquqlarının müdafiəsi və gender bərabərliyinin təmin olunması istiqamətində ölkəmizdə ardıcıl siyasət həyata keçirilir. Azərbaycan Respublikasının Ailə, Qadın və Uşaq Problemləri üzrə Dövlət Komitəsi tərəfindən reallaşdırılan proqram və layihələr qadınların sosial müdafiəsinin gücləndirilməsinə, onların sahibkarlıq fəaliyyətinə və ictimai təşəbbüslərə cəlb olunmasına xidmət edir.

Azərbaycan dövlətçilik tarixində qadına verilən yüksək dəyər Ümummilli Liderin siyasi xəttində də öz əksini tapmışdır. Heydər Əliyev qadınların cəmiyyətdəki rolunu yüksək qiymətləndirərək demişdir: “Azərbaycan qadını hər zaman öz müdrikliyi, sədaqəti və vətənpərvərliyi ilə seçilmişdir.” Bu fikir qadının milli kimliyimizin və mənəvi dayaqlarımızın formalaşmasındakı rolunu aydın şəkildə ifadə edir.

Bu siyasi kurs bu gün də uğurla davam etdirilir. Cənab Prezident İlham Əliyev çıxışlarında Azərbaycan qadınının ailə dəyərlərinin qorunmasında, gənc nəslin tərbiyəsində və dövlətin inkişafında müstəsna rol oynadığını xüsusi vurğulamış, qadınların ictimai-siyasi proseslərdə daha fəal iştirakını daim dəstəkləmişdir.

Eyni zamanda Azərbaycanın birinci xanımı Mehriban Əliyevanın çoxşaxəli fəaliyyəti qadının humanizm və mərhəmət missiyasının parlaq nümunəsidir. Onun təşəbbüsü ilə həyata keçirilən sosial və humanitar layihələr cəmiyyətin həssas təbəqələrinə, xüsusilə qadın və uşaqlara göstərilən diqqət və qayğının bariz təzahürüdür.

8 Mart – qadına yalnız gül təqdim olunan gün deyil. Bu tarix ana şəfqətinə, qadın zəhmətinə və onun səssiz fədakarlığına verilən yüksək dəyərin rəmzidir. Azərbaycan qadını həm ailənin dayağı, həm cəmiyyətin formalaşdırıcısı, həm də dövlətin inkişafında söz sahibi olan qüvvədir. Onun gücü sevgisində, səbrində və məsuliyyətindədir; onun rolu isə hər zaman uca və əvəzolunmazdır.

Cəmilə Hüseynova

YAP Naxçıvan şəhər təşkilatının fəalı

Paylaş:

Baxılıb: 293 dəfə