YAP Səbail rayon təşkilatı Gənclər Birliyinin IV hesabat-seçki konfransı keçirilib

Bakı:

24 °C

54 %

6 m/s

Əlaqə

AZ RU EN

Ana səhifə / YAP xəbərləri / YAP Səbail rayon təşkilatı Gənclər Birliyinin IV hesabat-seçki konfransı keçirilib

YAP Səbail rayon təşkilatı Gənclər Birliyinin IV hesabat-seçki konfransı keçirilib

16.04.2015 [10:21]

Dünən Yeni Azərbaycan Partiyası (YAP) Səbail rayon təşkilatı Gənclər Birliyinin IV hesabat-seçki konfransı keçirilib. Tədbirdə YAP Səbail rayon təşkilatının sədri, Milli Məclisin Elm və təhsil komitəsinin sədri Şəmsəddin Hacıyev, YAP Siyasi Şurasının üzvü, Səbail rayon İcra Hakimiyyətinin başçısı Asif Əsgərov, YAP Mərkəzi Aparatının məsul işçisi, partiyanın Siyasi Şurasının üzvü Misirxan Vəliyev və YAP Gənclər Birliyinin sədri, partiyanın Siyasi Şurasının üzvü Seymur Orucov iştirak ediblər.
Konfransa sədrlik edən YAP Səbail rayon təşkilatının sədr müavini Mehman İsmayılov bildirib ki, Azərbaycan gəncliyinin inkişafı və gənclər siyasətinin formalaşması Ümummilli liderimiz Heydər Əliyevin adı ilə bağlıdır. O, bu siyasətin Prezident İlham Əliyev tərəfindən uğurla davam etdirildiyini vurğulayıb.
YAP Səbail rayon təşkilatı Gənclər Birliyinin sədri Rəşad Fərəcov hesabat məruzəsi ilə çıxış edib. O, birliyin təşəbbüsü ilə ötən illərdə görülən işlər, həyata keçirilən tədbirlər haqqında məlumat verib, YAP Səbail rayon təşkilatı Gənclər Birliyinin üzvlərinin sayının 15 min 710 nəfər təşkil etdiyini qeyd edib. Daha sonra YAP Səbail rayon təşkilatı Gənclər Birliyinin fəal üzvləri Günay Qarayeva və Səməd Rzazadə çıxış edərək hesabatı müsbət qiymətləndiriblər.
Tədbirdə çıxış edən YAP Gənclər Birliyinin sədri, partiyanın Siyasi Şurasının üzvü Seymur Orucov Səbail rayon gənclərinə fəaliyyətlərində uğurlar arzulayıb. S.Orucov qeyd edib ki, dövlətin gənclər siyasəti gənc nəslin inkişafına xidmət edir.
YAP Siyasi Şurasının üzvü, Səbail rayon İcra Hakimiyyətinin başçısı Asif Əsgərov rəhbərlik etdiyi rayonun həyatında gənclərin fəal iştirak etdiyini diqqətə çatdırıb. O qeyd edib ki, rayon rəhbərliyi gənclərin bütün təşəbbüslərinə dəstək verir və bundan sonra da dəstək verəcək.
YAP Səbail rayon təşkilatının sədri, Milli Məclisin Elm və təhsil komitəsinin sədri Şəmsəddin Hacıyev çıxış edərək gənclərə gələcək fəaliyyətində uğurlar arzulayıb. Hazırda dünyada mürəkkəb proseslərin baş verdiyini deyən Ş.Hacıyev gənclərə təşəbbüskar olmağı tövsiyə edib. O bildirib ki, Prezident İlham Əliyev Azərbaycan gəncliyinin inkişafı üçün bütün imkanları yaradıb. “Hazırda dünyada çox mürəkkəb proseslər baş verir. Bu proseslər heç bir məntiqə sığmır. Təəssüf ki, bu gün beynəlxalq hüquq normaları işləmir, güclü dövlətlər öz məqsədlərini həyata keçirmək istəyirlər”, - deyə Şəmsəddin Hacıyev qeyd edib.
Ş.Hacıyev bildirib ki, bu proses fonunda dünya ölkələrində iqtisadi çətinliklər də baş verməkdədir. Onun sözlərinə görə, belə bir şəraitdə Azərbaycan inkişaf edir.
“Dünyanın inkişaf etmiş ölkələrində iqtisadi artım göstəricisi 1,4 faiz civarındadır. Amma Azərbaycanda bu göstərici daha yüksəkdir. Təkcə bu ilin birinci rübünün nəticəsinə görə, ölkəmizdə ÜDM 5 faiz, qeyri-neft sektoru isə 7 faiz artıb. Təbii ki, bu göstəricilərə düşünülmüş siyasət nəticəsində nail olunub. Bir sözlə, uğurlarımız davamlıdır. Azərbaycan regionun iqtisadi mərkəzidir”, - deyə Ş.Hacıyev vurğulayıb.
Ş.Hacıyev YAP Səbail rayon təşkilatının üzvlərinin partiyanın yerli strukturları arasında say baxımından ikinci yerdə olduğunu deyərək təşkilatda gənclərin böyük üstünlük təşkil etdiyini diqqətə çatdırıb. O qeyd edib ki, gənclər öz potensiallarından səmərəli istifadə etməlidirlər.
Konfransda təşkilati məsələlərə baxılıb. YAP Səbail rayon təşkilatı Gənclər Birliyinin 27 nəfərlik Şurası, 17 nəfərlik İdarə Heyəti müəyyənləşib. YAP Gənclər Birliyinin hesabat-seçki konfransına 20 nəfərdən ibarət nümayəndə seçilib. Rəşad Fərəcov yenidən YAP Səbail rayon təşkilatı Gənclər Birliyinin sədri və sədrin 7 nəfər müavini seçilib.
Nardar BAYRAMLI

Paylaş:

Baxılıb: 1041 dəfə