YAP qəlbi vətən sevgisi ilə dolu olan hər kəsin partiyasıdır

Bakı:

14 °C

88 %

5 m/s

Əlaqə

AZ RU EN

Ana səhifə / YAP xəbərləri / YAP qəlbi vətən sevgisi ilə dolu olan hər kəsin partiyasıdır

YAP qəlbi vətən sevgisi ilə dolu olan hər kəsin partiyasıdır

07.03.2019 [10:22]

Yeni Azərbaycan Partiyası Binəqədi rayon təşkilatının yaradılmasının 26-cı ildönümü və 8 Mart - Beynəlxalq Qadınlar Günü münasibətilə tədbir keçirilib
Dünən Yeni Azərbaycan Partiyası (YAP) Binəqədi rayon təşkilatının yaradılmasının 26-cı ildönümü və 8 Mart - Beynəlxalq Qadınlar Günü münasibətilə tədbir keçirilib. Binəqədi rayon İcra Hakimiyyəti, YAP Binəqədi rayon təşkilatı və Təhsil İşçiləri Azad Həmkarlar İttifaqının birgə təşkilatçılığı ilə keçirilən tədbiri giriş sözü ilə YAP Binəqədi rayon təşkilatının sədri Ramiz Göyüşov açıb. Öncə tədbir iştirakçılarını əlamətdar günlər münasibəti ilə təbrik edən R.Göyüşov sonra YAP-ın Azərbaycanın siyasi həyatında əvəzsiz rolu barədə danışıb. Natiq partiyanın təkcə ölkəmizdə deyil, Qafqazda, hətta bütün dünyada yüksək nüfuza malik olduğunu qeyd edib. O, partiyanın sıralarının gündən-günə artmasının, sosial bazasının daha da möhkəmlənməsinin xalqımızın Heydər Əliyev ideyalarına etimadının və dövlətimzin başçısı, Yeni Azərbaycan Partiyasının Sədri İlham Əliyevin siyasətinə dəstəyinin bariz nümunəsi olduğunu söyləyib.
Ramiz Göyüşov bildirib ki, YAP-ın yaradılmasından sonra ilk yaradılan rayon təşkilatlarından biri də məhz Binəqədi rayon təşkilatıdır. Qeyd edilib ki, 1993-cü ilin 7 mart tarixində təsis edilən YAP Binəqədi rayon təşkilatı hazırda sıralarında 15 mindən çox partiya üzvünü birləşdirir.
Sonra çıxış edən Milli Məclisin Aqrar siyasət komitəsinin sədri, YAP İdarə Heyətinin üzvü Eldar İbrahimov partiyanın yaradılmasının tarixi zərurət olduğunu bildirərək diqqəti o zamankı siyasi vəziyyətə yönəldib. Komitə sədri 1990-cı illərin əvvəllərində ölkəni idarə edən şəxslərin yarıtmaz fəaliyyətinin xalqın səbir kasasının daşmasına səbəb olduğunu, xalqımızın Ulu Öndər Heydər Əliyevin hakimiyyətə gəlməsini tələb etdiyini, Ümummilli Liderimizin 1993-cü ildə yenidən siyasi hakimiyyətə qayıdaraq Azərbaycanı məhv olmaq təhlükəsindən xilas etdiyini bildirib. E.İbrahimov həmçinin Ulu Öndər Heydər Əliyevin Azərbaycan dövlətçiliyinin inkişafı üçün misilsiz xidmətlər göstərdiyini və Ümummilli Liderimiz tərəfindən əsası qoyulan siyasətin bu gün Prezident İlham Əliyev tərəfindən uğurla davam etdirildiyini diqqətə çatdırıb.
Komitə sədri həmçinin YAP Binəqədi rayon təşkilatının üzvlərinin rayondakı ictimai-siyasi proseslərdə öz fəallıqları ilə fərqləndiklərini deyib. Çıxışında Azərbaycan tarixində, elm və mədəniyyətində Azərbaycan qadınının özünəməxsus yeri haqqında da danışan natiq YAP-ın yarandığı tarixi dövrdə də Azərbaycan qadınının siyasi proseslərdə yaxından iştirak etdiyini bildirib.
Çıxış edən Bakı şəhər İcra Hakimiyyəti başçısının müavini Füdumə Hüseynova partiyanın yarandığı gündən dövlətə, xalqa xidməti fəaliyyətinin əsas istiqaməti kimi qəbul etdiyini bildirib. F.Hüseynova tarixi müstəqil Azərbaycanın tarixi ilə üst-üstə düşən Yeni Azərbaycan Partiyasının ölkəmizin keçdiyi inkişaf yolunun bələdçisi, uğurların təminatçısı olduğunu qeyd edib.
Natiq çıxışında, eyni zamanda, Azərbaycanda Prezident İlham Əliyevin rəhbərliyi ilə həyata keçirilən siyasətdə qadınların da mühüm rol oynadığını deyib.
“Səs” qəzetinin baş redaktoru Bəhruz Quliyev də çıxışında YAP-ın Azərbaycanın siyasi həyatındakı əhəmiyyətli yerindən və rolundan bəhs edib. Natiq partiyanın yaranması və uğurlu siyasi fəaliyyəti ilə Azərbaycanı düşdüyü çətin vəziyyətdən xilas etdiyini, xalqımızı nicat yoluna çıxardığını vurğulayıb. Bəhruz Quliyev deyib ki, YAP təkcə partiya üzvlərinin deyil, qəlbi vətən sevgisi ilə dolu olan hər kəsin partiyasıdır. Natiq həmçinin ölkəmizdə uğurlu qadın siyasətinin həyata keçirildiyini də bildirib.
Təhsil işçiləri Azad Həmkarlar İttifaqı Respublika Komitəsinin sədr müavini Mirzə Cəfərzadə də öncə tədbir iştirakçılarını iki əlamətdar hadisə münasibətilə təbrik edib. O, Azərbaycan qadınlarının ölkə tarixinin bütün dövrlərində xalqın taleyüklü məsələlərinin həll edilməsi işinə öz töhfələrini verdiyini deyib.
Tədbirdə çıxış edən Binəqədi rayon İcra Hakimiyyətinin başçısı Elxan Allahverdiyev müstəqilliyin əvvəllərində ölkəmizdə bütün sahələrdə tənəzzülün yaşandığı dövrdə yaranan YAP-ın Azərbaycanın inkişafında, dövlətin güclənməsində, xalqımızın firavanlığına qovuşmasında misilsiz xidmətlər göstərdiyini vurğulayıb. Bildirib ki, bütün bunlar partiyanın qurucusu Ümummilli Lider Heydər Əliyevin uğurlu strategiyasının məntiqi nəticəsi idi. Bu gün bu siyasətin Prezident İlham Əliyev tərəfindən uğurla həyata keçirilməsi nəticəsində sürətlə inkişaf edən Azərbaycan mühüm nailiyyətlər qazanıb.
Binəqədi rayon İcra Hakimiyyətinin başçısı həmçinin ölkəmizdə həyata keçirilən uğurlu qadın siyasətindən və qadınların cəmiyyətdə, ictimai-siyasi həyatda fəallıqlarından söhbət açıb. Natiq ölkəmizin Birinci vitse-prezidenti Mehriban xanım Əliyevanın timsalında Azərbaycan qadınlarının bütün sferalarda uğurlar qazandıqlarını və bu uğurların ölkəmizin daha da inkişafına zəmin yaratdığını vurğulayıb.
Çıxışlardan sonra rayonun ictimai-siyasi və mədəni həyatında səmərəli fəaliyyətinə görə fərqlənən bir qrup qadın fəxri fərman və hədiyyələr ilə təltif olunub.
Tədbir bədii hissə ilə davam etdirilib.
Nadir AZƏRİ