ANAMA və YAP Binəqədi rayon təşkilatı birgə maarifləndirmə tədbiri keçirib

Ana səhifə / YAP xəbərləri / ANAMA və YAP Binəqədi rayon təşkilatı birgə maarifləndirmə tədbiri keçirib

ANAMA və YAP Binəqədi rayon təşkilatı birgə maarifləndirmə tədbiri keçirib

26.12.2022 [14:13]

Azərbaycan Respublikasının Minatəmizləmə Agentliyi (ANAMA) tərəfindən YAP Binəqədi rayon təşkilatının təşəbbüsü ilə icra hakimiyyəti, rayon ərazisində fəaliyyət göstərən keçmiş məcburi köçkün ümumtəhsil və peşə məktəbləri nümayəndələrinə, müvafiq qurumların əməkdaşlarına, eləcə də rayonun ictimai həyatında yaxından iştirak edən partiya üzvlərinə “Partlayıcı Sursatların Təhlükəsinə dair Maarifləndirmə” (PSTM) tədbiri keçirilib.

Tədbirdə Azərbaycan Respublikasının Minatəmizləmə Agentliyinin Beynəlxalq əlaqələr, maarifləndirmə və mətbuatla iş idarəsinin rəisi Ramil Əzizov, YAP Binəqədi rayon təşkilatının sədri Vüsar İsmayılov, eləcə də ANAMA və YAP-ın məsul nümayəndələri iştirak edib.

Tədbirin məqsədi mina təhlükəsi ilə mübarizə fəaliyyətinin əsas istiqamətlərindən biri olan partlayıcı sursatların təhlükəsi haqqında biliklərin artırılmasından ibarət olub.

Açılış nitqi ilə çıxış edən YAP Binəqədi rayon təşkilatının sədri Vüsar İsmayılov qeyd edib ki, minalar və müharibənin partlamamış hərbi qalıqları münaqişələr bitdikdən sonra onilliklər boyu təhlükəsizliyə, inkişafa böyük əngəl törədir. Təəssüf ki, minalardan zərərçəkən vətəndaşlarımız da var. Bu kimi halların qarşısını almaq üçün Agentlik tərəfindən mütəmadi olaraq maarifləndirmə tədbirləri keçirilir. Vətəndaşların öz doğma yurdlarına təhlükəsiz şəkildə qayıtması görülən işlərin əsas məqsədidir.

ANAMA-nın idarə rəisi Ramil Əzizov bildirib ki, mina və partlayıcı sursatların təhlükəsinə dair maarifləndirmə tədbirləri işğaldan azad edilmiş ərazilərdə bərpa-quruculuq işlərinə cəlb olunan qurumların nümayəndələri, mülki əhali, eləcə də müharibənin təsirinə məruz qalmış rayonlarda yaşayan sakinlər arasında təhlükəsizliyin təmin edilməsi baxımından mühüm rol oynayır. Bu sahədə ANAMA tərəfindən ümumi maarifləndirmə, təlimçilərin təlimi, icma əsaslı PSTM və məktəblərdə maarifləndirmə tədbirləri həyata keçirilir.

Tədbirdə partlayıcı sursatların təhlükəsinə dair maarifləndirmənin ümumi əsasları, davranış qaydaları, mina haqda yanlış təsəvvürlər barədə iştirakçılara məlumat verilib, minalanmış ərazilərin əlamətləri, eləcə də təhlükə anında həyata keçirilməli olan addımlar iştirakçıların diqqətinə çatdırılıb.

Həmçinin, müxtəlif növ mina və sursatların vizual tanınması məqsədilə maketlər nümayiş olunub.

Paylaş:

Baxılıb: 86 dəfə